(E plotësuar) - Hekuran Murati, iniciues i mbledhjes së nënshkrimeve për heqjen e homologimit të automjeteve, sot ka dorëzuar mbi 10 mijë nënshkrime në lidhje me këtë çështje në Kuvendin e Kosovës.
Murati, pas dorëzimit të nënshkrimeve, tha se me një shtet si ky i yni, që nuk kujdeset për qytetarët e saj, është dashur Bashkimi Evropian dhe Ambasada Amerikane që të reagojnë për heqjen e monopolit për homologim.
“Kërkesa jonë është që të hiqet i gjithë homologimi sepse është një plaçkë prej 100 euro, ngase këtë ka mundur ta bëjë Dogana e Kosovës”, tha Murati.
Për procedurat tjera të këtij peticioni, Murati tha se tash e tutje duhet që gjashtë deputetë ta çojnë këtë proces tutje për ndryshimet ligjore.
Sipas tij, për heqjen e kësaj plaçkë tashmë është në dorën e deputetëve të Kuvendit të Kosovës.
Periudha e nënshkrimit të peticionit online ka zgjatur tri javë.
***
Mbi 10 mijë nënshkrime janë mbledhur në Peticionin për heqjen e homologimit në Kosovë.
I njëjti është dërguar sot në Kuvendin e Kosovës, në të cilin kërkesa kryesore është heqja e tërësishme e obligimit të homologimit në Kosovë.
Çështja e homologimit të veturave u bë temë aktuale në vend pas seancës së mbajtur në Kuvendin e Kosovës.
Trajtimi i çështjes së lartëpërmendur është bërë edhe në aspektin e monopolist në homologim.
Aktualisht në Kosovë ky shërbim kryhet vetëm nga kompania “EuroLab”.
Deputetët në seancën e mbajtur kishin kritikuar edhe për faktin se veturat e reja të cilat sillen nga vendet e tjera në Kosovë, detyrohen t’i nënshtrohen homologimit dhe në këtë formë, kostoja është shumë më e lartë për qytetarët e Kosovës.