Deputetja e AAK-së kundër vendimit të KSHC-së: Po bëhet biznes me arsimin e lartë - Bota Sot
Deputetja e AAK-së kundër vendimit të KSHC-së: Po bëhet biznes me arsimin e lartë

Aktuale

Deputetja e AAK-së kundër vendimit të KSHC-së: Po bëhet biznes me arsimin e lartë

Më: 18 korrik 2019 Në ora: 21:40
Deputetja e AAK-së, Teuta Haxhiu

Deputetja e AAK-së, Teuta Haxhiu e cila është edhe nënkryetare e Komisionit për Arsim në Kuvendin e Kosovës ka thënë se me arsimin e lartë në Kosovë po tentohet të bëhet biznes në dëm të qytetarëve të varfër.

Haxhiu, në RTV Dukagjini, ka thënë se universitet publike u themeluan me votat e shumicës së deputetëve të Kuvendit të Kosovës.

“E kam mbrojtur vendimin për themelimin e këtyre universiteteve sepse një student nga një fshat i Gjakovës e ka mundësinë që me 50 cent të shkojë në Gjakovë, Pejë apo Prizren për të studiuar dhe nuk e ka luksin sikur fëmija im apo i ndonjë deputeti për të shkuar në kolegje private”, tha ajo.

Ajo ka thënë se mbyllja e këtyre universiteteve është shumë shqetësuese duke e konsideruar si hap të ngutshëm.

“Në Kosovë bëhet biznes me arsimin e lartë. Biznesin e bëjnë ata që kanë mjete materiale. Ata që nuk kanë mjete, janë të diskriminuar në arsim”.

Nënkryetarja e Komisionit për Arsim në Kuvendin e Kosovës, thotë se rreth 8,000 studentë studiojnë në universitetet e mbyllur publike dhe mbyllja e tyre sipas saj do të ishte mundësi biznesi për kolegjet private.

“Nëse marrim 1,000 euro mesatarisht vitin që paguajnë studentët në kolegjet private, qytetarët tanë nuk e kanë standardin t’i dërgojnë fëmijët në këto institucione”.

Deputetja e AAK-së thotë se Kosova nuk ka mundësi t’u ofrojë punë kandidatëve që kanë vetëm shkollën e mesme prandaj studimet janë të nevojshme për punësim.

Ajo shton se nëse mbyllen universitetet publike e prindërit nuk kanë mundësi për t’i dërguar fëmijët në kolegje private, ata të rinj do të largohen nga vendi.

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...