Ramush Haradinaj sot dha dorëheqje nga posti i kryeministrit.
Sipas të gjitha gjasave, vendi do të shkojë në zgjedhje, ndonëse ekziston mundësia teorike që të gjendet një kandidat tjetër për postin e kryeministrit nga koalicioni qeverisës.
Në atmosferën e befasisë së madhe me vendimin e Haradinajt dhe dilemave për të ardhmen e koalicionit, sakaq u shfaq një politikan me pedigre i cili publikisht – pa iu dridhur tastatura – tha se i ishte ofruar posti i kryeministrit, por – çuditërisht dhe historikisht – ai e kishte refuzuar.
Siç mund të supozoni, emri i tij është – Armend Ibrahimi.
Kredencialet e tij për ndërtimin e urave për bashkëpunime ndërpartiake janë të dëshmuara. Dikur ai ishte kryetar i Forumit Rinor të LDK-së, por më vonë kishte kaluar në taborin diametralisht të kundërt, duke aderuar në PDK.
“Më është ofruar posti i Kryeministrit me një rikombinim të forcave aktuale politike në vend. E kam refuzuar sepse besoj se Kryeministri i ardhshëm duhet të vijë nga zgjedhjet e reja dhe jo nga një mënyrë apo rrugë tjetër”, është shprehur ky anëtar aktual i Partisë Demokratike të Kosovës dhe ish anëtar i Lidhjes Demokratike të Kosovës.
Madje, paradoksalisht, ai për këtë çështje – pra, ofertën për postin e kryeministrit dhe refuzimin stoik – ka kërkuar mendim demokratik dhe transparent edhe nga “fansat” e tij në Facebook.
“Shqetësimin e kam se ka të atillë që duan që të bëhen Kryeministër pa shkuar në zgjedhje. I mirëpres mendimet tuaja”.
Dhe mendimet nuk kanë munguar, ndonëse shumica dërrmuese kanë qenë ironizuese dhe sarkastike.
Reagimi i Ibrahimit:
Te dashur qytetare te Republikes se Kosoves
Me eshte ofru posti i Kryeministrit me nje rikombinim te forcave aktuale politike ne vend. E kam refuzuar sepse besoj se Kryeministri i ardhshem duhet te vije nga zgjedhjet e reja dhe jo nga nje menyre apo rruge tjeter.
Shqetesimin e kam se ka te atille qe duan qe te behen Kryeminister pa shkuar ne zgjedhje.
I mirepres mendimet tuaja.