Kryeministri Ramush Haradinaj, i cili dha dorëheqje të parevokueshme nga posti i shefit të qeverisë nuk ka të drejtë të organizojë mbledhje të ekzekutivit.
Kështu e nis raportimin televizion Klan, i cili njihet si i afërt me presidentin Thaçi.
“Por me dorëheqjen e Haradinajt nuk do të thotë se ka rënë qeveria e Kosovës”, raporton tutje ky televizion që drejtohet nga Baton Haxhiu.
Kushtetuta e Republikës së Kosovës parasheh që qeveria të bie vetëm në rast të shpërbërjes së Parlamentit të Kosovës, ndërsa një gjë e tillë ende nuk ka ndodhur, tek sa Kuvendi është ende funksional, shkruan Ballkani.info
Bazuar në aktin më të lartë juridik në vend, pas dorëheqjes së parevokueshme të kryeministrit, barra e përgjegjësisë bie mbi zv. kryeministrin e parë.
Kjo nënkupton se Behgjet Pacolli do të duhej të ushtronte pozitën e të parit të qeverisë, deri në një vendim të radhës të presidentit të vendit, i cili detyrohet gjejë zgjidhje në bazë të mandatit të tij Kushtetutës, thekson tutje Klani.
Të kujtojmë se sot presidenti Thaçi ka njoftuar se javën e ardhshme do t’i ftojë partitë për konsultime pas dorëheqjës së kryeministrit Haradinaj.
Në ndërkohë, të gjitha partitë, pa përjashtim, janë shprehur pro mbajtjes së zgjedhjeve të parakoheshme.
