Shqipe Pantina e PSD-së: Kemi mbetur partia e vetme që s’po mendojmë për veten

Aktuale

Shqipe Pantina e PSD-së: Kemi mbetur partia e vetme që s’po mendojmë për veten

Më: 7 gusht 2019 Në ora: 20:12
Deputetja e PSD-së, Shqipe Pantina

Deputetja e PSD-së, Shqipe Pantina, ka thënë se kjo parti po përgatitet që të shkojë në zgjedhjet e jashtëzakonshme, sipas afateve ligjore, pas shpërndarjes së kësaj legjislature të Kuvendit.

“Nuk është çështje e të qenit gati ose jo. Kjo datë [22 gushti] tashmë është caktuar nga kryesia e Kuvendit dhe është një konsensus politik i shprehur publikisht nga të gjitha subjektet politike që zgjidhja më e mirë për situatën aktuale është që vendi të shkojë në zgjedhje dhe institucionet e ardhshme të marrin një legjitimitet të ri”.

“Ne si PSD po punojmë në përgatitje të strukturave tona. Kam takuar dhjetëra të rinj, kryesisht vullnetarë, që janë lajmëruar përmes uebfaqës tonë nga të cilët kemi kërkuar që të angazhohen për të gjitha përgatitjet e nevojshme për t’u futur në procesin zgjedhor”.

“Kemi mbledhur po ashtu Këshillin Drejtues për të mobilizuar dhe bërë thirrje që të fillojnë përgatitjet në degët tona për zgjedhje”.

Por, a i ka konvenuar Partisë Socialdemokrate që vendi të shkojë në zgjedhje në këtë kohë?

“Për fat të keq po duket që kemi mbetur partia e vetme që nuk po mendojmë fare për fatin tonë. Shumë pak kemi menduar për fatin tonë si subjekt dhe aq më pak për fatin tonë si individë”.

“Arsyeja pse unë dhe kolegët e mi jemi në politikë është që të bëjmë diçka të mirë për vendin sepse ne këtu jetojmë”.

“Do të isha më e lumtur po të mos isha pjesë e politikës, por të jetoja në një vend ku ka mirëqenie për qytetarët, papunësia është në nivel të ulët, ku ka cilësi të lartë në arsim, shëndetësi dhe fusha të tjera – kushdo që mund të na i garantojë këto nuk e kemi problem fare ta lëmë politikën”.

“Mungesa e tyre na ka bërë që të angazhohemi politikisht dhe këto i kemi bërë synime në programin që jemi duke e hartuar, pra programi jonë do të jetë i fokusuar në çështjet që në zhargonin e përditshëm politik janë konsideruar si ‘çështje të vogla’ dhe që ne mendojmë se janë çështjet më të rëndësishme që politika duhet të merret”.

Pantina në Info Magazine ka thënë se dialogu me Serbinë ishte ‘mollë sherri’ që vendi të shkojë në zgjedhje.

“Arsyeja se pse nuk ka funksionuar kjo qeveri dhe legjislatura ka pasë të bëjë edhe me çështjen e mozgjidhjes të konfliktit, tashmë dy dekada, të hapur me Serbinë. Po shpresoj që Qeveria e ardhshme do të arrijë ta përmbyllë këtë sagë të konfliktit të hapur me Serbinë dhe ne t’i kthehemi problemeve jetike”.

Pantina ka thënë se krijimi i një qeverie teknike nuk ka qenë opsion në situatën e krijuar pas dorëheqjes së Ramush Haradinajt nga posti i kryeministrit.

“Nuk besoj se ka pasë diskutime serioze për qeveri teknike. Mendoj që kanë qenë më shumë diskutime në media, ndoshta edhe në prapaskena”.

“Tek ne në PSD nuk kemi pasë kërkesë që të bëhemi pjesë e ndonjë qeverie teknike. Nuk e di nëse kjo ka qenë një çështje që është diskutuar në ndonjë subjekt tjetër politik, por te ne jo”.

Deputetja e PSD-së ka folur edhe për punën dhe mospunën e kësaj legjislature të Kuvendit të Kosovës.

“Është vështirë të vlerësohet edhe votimi i deputetëve dhe ligjet vetëm nga ajo që shihet në media. Puna më e madhe bëhet ne Komisionet Punuese dhe Grupet Punuese ku deputetët që janë më aktivë nuk janë ata që janë më të zhurmshmit edhe në seanca”.

“Për fat të keq, seancat janë shndërruar në arena të debateve primitive pjesë e të cilave unë nuk dua të jem asnjëherë”.

“Kam qenë edhe unë edhe shumica e Grupit tim Parlamentar në debatet e tilla sepse ne mendojmë që në Kuvend duhet të debatohet për çështje, përmbajtje të ligjeve apo për politika të tjera”.

“Mendoj që Kuvendi ka dështuar plotësisht është hapësira që na është dhënë për ta mbikëqyrë ekzekutivin. Deputetët nuk janë aty vetëm për të votuar, por janë aty për të mbikëqyrë Qeverinë dhe një varg institucionesh dhe agjencish të tjera”.

“Një nga mënyrat se si ne e mbikëqyrim ose kërkojmë llogari nga Qeveria janë pyetjet parlamentare. Unë akoma e kam një listë të gjatë të pyetjeve që kam dashur t’ua drejtojë sepse nuk mundesh të drejtosh më shumë se dy pyetje për një seancë”.

commentFirst article
Sot mund të lexoni Shfletoni kopertinat