(E plotësuar) - Ministri i Tregtisë dhe Industrisë, Endrit Shala, ka vendosur masa reciproke ndaj mjaltit dhe patateve të Maqedonisë Veriore, për shkak se kjo e fundit është duke aplikuar barriera tarifore ndaj produkteve të Republikës së Kosovës.
Ministri Shala ka theksuar se që nga qershori i këtij viti kur produktit të Kosovës, rasatit të peshkut i janë vendosur barrierat tarifore nga Republika e Maqedonisë së Veriut, ka dërguar ankesa përmes sekretariatit të CEFTA-së dhe po ashtu iu ka drejtuar me një letër ministrit të Eekonomisë, por që nuk kanë reflektuar.
“Dhe tashmë kanë kaluar dy muaj dhe nuk kemi asnjë përgjigje, prandaj jam i detyruar që në mbrojtje të interesit të Kosovës, biznesit kosovar dhe në mbrojtje të prodhimeve tona që të ndërmarr veprime të tjera ligjore,në bazë të ligjeve të Republikës së Kosovës. Sot kam marr vendimin që të vendos masa reciproke për produktet e Maqedonisë së Veriut që importohen në Kosovë dhe të ndalojë hyrjen e disa produkteve, në mënyrë që të detyrojë shtetin e Maqedonisë së Veriut që të reflektojë dhe të ketë trajtim të barabartë për produktet e Kosovës që hyjnë në atë shtet”, tha ministri Shala.
Ministri ka theksuar se duhet të ketë trajtim të barabartë, që sipas tij, është e vetmja rrugë që duhet të ecim përpara.
“Reciprociteti, partneriteti dhe trajtimi i barabartë i prodhimeve kosovare gjatë eksportit në vendet e rajonit, është e vetmja rrugë me të cilën duhet të ecim përpara. Në rast se ky tretman do të vazhdojë ne do të marrim edhe hapa tjerë, jo vetëm ndaj këtij shteti por edhe shteteve tjera. Tashmë asnjë prodhim Kosovar që eksportohet jashtë nuk do të ketë tretman të pabarabartë”, ka theksuar ministri.
***Ministri i Tregtisë dhe Industrisë, Endrit Shala, ka marrë vendimin për marrjen e masës reciproke ndaj Maqedonisë Veriore në dy produkte.
Shala ka vendosur që t’i vendoset taksa shtetit fqinj në importimin e mjaltit natyral dhe patatet. Vendimi hyn në fuqi menjëherë. Ky vendim i është nënshkruar edhe nga Dogana së Kosovës e cila obligohet që të zbatojë masat nga pika e parë e këtij vendimi.
