Shtetet e Bashkuara të Amerikës, kanë dhënë dorëheqje nga bordi i Agjencisë Kosovare për Verifikimin e Pronës.
Ambasada amerikane në Prishtinë, ka konfirmuar se dorëheqja vie si shenjë pakënaqësie ndaj mosreagimit të institucioneve për shkarkimin e Naser Shalës nga pozita e kryetarit të këtij institucioni, përcjell Bota sot.
Ambasada amerikane ka thënë se SHBA nuk do të vazhdojë aty ku lidershipi i shërben interesave personale dhe politike, më shumë se popullit.
Ambasadori Phillip Kosnett, ka theksuar se zgjedhja e njerëzve të pakualifikuar për pozita qeveritare e dëmton imazhin e Kosovës dhe e tradhton besimin publik.
Dorëheqje nga ky bord, më herët ka dhënë edhe Britania e Madhe.
“SHBA-të kanë dhënë dorëheqje nga Bordi i Agjencisë së Verifikimit të Pronës, siç ka bërë edhe Britania. Ne nuk do të vazhdojmë aty ku lidershipi i shërben interesave personale dhe politike, më shumë se popullit. Zgjedhja e njerëzve të pakualifikuar për pozita qeveritare e dëmton imazhin e Kosovës dhe e tradhton besimin publik”, ka shkruar ambasadori Kosnett në rrjetet sociale./BS
