Tash e sa kohë, Lëvizja Vetëvendosje dhe Lidhja Demokratike e Kosovës ishin në kërkim të numrave për të rrëzuar qeverinë Haradinaj. Por, seanca për t’i dhënë fund qeverisjes së koalicionit aktual po mbahet pasi shefi i ekzekutivit Ramush Haradinaj dha dorëheqje nga pozita e tij dhe kërkoi zgjedhje të reja.
Në Lëvizjen Vetëvendosje thonë se nesër do të japin votën e tyre pro shpërndarjes së Kuvendit.
Këtë, edhe njëherë e ka konfirmuar deputet Ismajl Kurteshi.
“Po Lëvizja Vetëvendosje nesër do të votoj për shpërndarjen e Kuvendit të Kosovës e kemi deklaruar këtë edhe më herët”, tha ai për KosovaPress
Gjatë ditës së sotme deputeti Ilir Deda është takuar me deputeten e Lidhjes Demokratike të Kosovës, Vjosa Osmani ku ka publikuar një fotografi të përbashkët në të cilën shkruan “Gati për shpërbërjen e Kuvendit”.
Nesër pritet të mbahet seanca e Kuvendit të Kosovës, e caktuar nga Kryesia e Kuvendit për shpërndarjen e Parlamentit, derisa tashmë janë dorëzuar nënshkrimet nga partitë e mëdha.
Seanca e nesërme pritet të fillojë në orën 10:00 ku si pikë e parë e rendit të ditës do të jetë shqyrtimi i projektligjit për ratifikimin e marrëveshjes financiare për IPA 2018 ndërmjet Kosovës dhe Bashkimit Evropian, ndërsa pika tjetër është votimi për shpërndarjen e Kuvendit të Kosovës.
