Bahtiri kalon zyrtarisht në VV: Kurti më mbështeti në kohë të vështira - Bota Sot
Bahtiri kalon zyrtarisht në VV: Kurti më mbështeti në kohë të vështira

Aktuale

Bahtiri kalon zyrtarisht në VV: Kurti më mbështeti në kohë të vështira

Më: 23 gusht 2019 Në ora: 17:07
Agim Bahtiri, Albin Kurti

(E plotësuar) - Kryetari i Mitrovicës Agim Bahtiri, ka aderuar sot në Lëvizjen Vetëvendosje.

Gjatë një ceremonie të veçantë ka bërë të ditur arsyen e këtij veprimi duke përmendur faktin se asnjëherë nuk ka pasur mbështetjen e qeverisë për mbrojtjen e qytetit të Mitrovicës dhe as të anëtarëve të AKR-së ku ai ishte nënkryetar.

Sipas tij, Albin Kurti ishte personi i vetëm i cili në kohët më të vështira kur diskutohej në qendrat evropiane për Mitrovicën, kishte mbështetur jashtëzakonisht shumë, duke ndihmuar dhe orientuar atë në rrugë të drejtë pa bërë ndonjë gabim.

Bahtiri: Nuk e kisha përkrahjen e Qeverisë dhe AKR-së

“Nuk mund të mos e them një gjë që më ka brengosur tërë jetën prej ardhjes time në pushtet më 2013. Asnjëherë nuk kam pasur përkrahjen e qendrës për të mbrojtur një pëllëmbë të kësaj Mitrovice në të cilën janë pasuruar shumë njerëz, kanë studiuar shumë njerëz, janë shkolluar dhe arsimuar me djersën e minatorëve të Trepçës, në Mitrovicën e cila ka qenë shembull dhe një gjigant i madh i ekonomisë së Kosovës. Dhe kjo është për të ardhur keq prej qeverisë së Kosovës, duke përfshirë edhe partinë në të cilën kam qenë si nënkryetar. Kjo më ka shtyrë që njëherë e përgjithmonë t’i bashkëngjitëm një subjekti politik…Unë e njihja Albin Kurtin prej së largu, por ai më njoftoi mua nga afër dhe më doli në mbështetje duke më takuar mua në atë kohë shumë të shkurtër që kisha në mes të seancave për të më ndihmuar dhe për të më orientuar në rrugë n e drejtë që mos të gaboj në hap pa dije. Unë e falënderoj publikisht dhe prej atëherë e dua me zemër dhe shpirt”, tha Bahtiri.

Në anën tjetër, Albin Kurti, duke i dëshiruar Bahtirit mirëseardhje në Vetëvendosje, tha se ceremonia e sotme është diçka e rëndomtë sepse as ai nuk është për herë të parë në Mitrovicë dhe as Agim Bahtiri nuk është për herë të parë në Vetëvendosje.

Sipas tij, Mitrovica është qyteti ku zhvillohet ekonomia dhe mbrohet shtetësia, ndërsa fati i Kosovës varet dhe matet në Mitrovicë.

Ai shtoi se Kosova është me fat që ka kryetar Agim Bahtirin në Mitrovicë.

Kurti: Jemi me fat që kemi Agim Bahtirin kryetar në Mitrovicë

“Mitrovica nuk është një qytet i zakonshëm, prandaj në Mitrovicë nuk mund të jesh kryetar i zakonshëm. Mitrovica është më shumë se një qytet për popullin dhe shtetin e Kosovës. Mitrovica është qyteti i punëtorëve e minatorëve, është qytet i kulturës dhe shkencës, Mitrovica është qyteti ku zhvillohet ekonomia dhe ku mbrohet shtetësia. Fati i Kosovës varet dhe matet në Mitrovicë. Prandaj besoj se jemi me fat që kemi Agim Bahtirin kryetar në Mitrovicë”, theksoi Kurti.

Ndryshe, Bahtiri u zgjodh kryetar i Mitrovicës si kandidat i Aleancës Kosova e Re, ndërsa në dy mandatet e tij në krye të kësaj komune ka bashkëqeverisur fillimisht me LDK-në, e më vonë me Lëvizjen Vetëvendosje.

***

Kryetari i Komunës Jugore të Mitrovicës, Agim Bahtiri, sot edhe zyrtarisht i është bashkuar Lëvizjes Vetëvendosje të Albin Kurtit.

Në ceremoninë e aderimit të kalimit të Bahtirit nga AKR-ja në  Vetëvendosje po merr pjesë vetë kreu i LVV’së, deputeti Xhelal Sveçla dhe disa zyrtarë të tjerë të Vetëvendosjes.

Kurti në fjalën e tij ka thënë se kjo nuk është hera e parë që ai gjendet në Mitrovicës, dhe nuk është hera e parë që Agim Bahtiri gjendet në Vetëvendosje.

Kurti ka treguar për një bisedë që ka pasur me Bahtirin në vitin 2018, në të cilën kreu i Mitrovicës ka thënë se disa lagje të Mitrovicës së tij kurrë nuk do të mbesin nën Serbi.

“Duke iu falënderuar qëndresës së kryetarit Bahtiri, sot nuk e kemi kufirin në lumin Ibër”, ka thënë Kurti.

Kreu i VV’së ka thënë se dita e zgjedhjeve do të jetë një ditë feste.

“Jemi të bindur që bashkë me Agim Bahtirin dhe aktivistët e tjerë të AKR’së, ditën e zgjedhjeve do ta shndërrojmë në ditë fitoreje e ditë feste”, ka thënë ai.

Ndërkohë në fjalën e tij Bahtiri ka thënë se Albin Kurtin e ka mik të zemrës. Bahtiri gjithashtu ka falënderuar aktivistët e AKR-së për mbështetjen që i kanë dhënë për të mirën e Mitrovicës.

Ai gjithashtu ka kritikuar institucionet qendrore, duke thënë se nuk e kanë përkrahur punën e tij në Mitrovicë.

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...