Kuçi: Do të bashkëpunojmë me parti që kanë pretendime më të mëdha se 5%

Aktuale

Kuçi: Do të bashkëpunojmë me parti që kanë pretendime më të mëdha se 5%

Më: 23 gusht 2019 Në ora: 21:15

Partia Demokratike e Kosovës nuk ka menduar ende për ndonjë koalicion të mundshëm me partitë tjera politike, derisa është e hapur për bashkëpunim me të gjitha ato parti që kanë pretendime më të mëdha se 5%. Kështu tha nënkryetari i PDK-së, Hajredin Kuçi pas mbledhjes së këshillit drejtues të kësaj partie.

Ai para mediave tha se me vota unanime është zyrtarizuar si kandidat i PDK-së për kryeministër, i pari i kësaj partie, Kadri Veseli.

Kuçi: Me vota unanime këshilli drejtues zgjodhi Kadri Veselin si kandidat për kryeministër

“Këshilli drejtues në mënyrë unanime zgjodhi Kadri Veselin, kandidat për kryeministër të Republikës së Kosovës. Kadri Veseli tashmë është një personalitet i dëshmuar jo vetëm në luftën për liri, në luftën çlirimtare të Kosovës,  por edhe dëshminë e tij për ekspertizën që e ka bërë edhe në aktivitetin e tij, në veçanti atë institucionale si kryetar i Kuvendit për dy mandate, dhe tani edhe si kryetar i Partisë Demokratike të Kosovës”, tha Kuçi.

Sipas Kuçit, Veseli ka vepruar edhe kundër korrupsionit dhe nepotizmit. Për çka siç tha ai, ka bërë reforma të guximshme, duke nisur nga brenda PDK-së.

Në 20 vjetët e fundit, ai ka thënë se PDK ka bërë shumë për vendin dhe se njerëzit e PDK-së kanë udhëhequr luftën për liri, procesin e pavarësisë dhe shtetndërtimin.

I pyetur për koalicionet zgjedhore me partitë tjera politike, Kuçi tha se do të jenë në bashkëpunim me partitë të cilat kanë pretendime më të mëdha se 5 për qind.

Kuçi: Nuk kemi menduar ende që të bëjmë koalicione zgjedhore

“Partia Demokratike e Kosovës hynë në këtë garë zgjedhore me bindjen që do të fitojë zgjedhjet dhe do të jetë partia e parë politike në vend. Ne do të jemi në bashkëpunim edhe me parti të tjera politike të vendit. Por me këto parti të cilat kanë pretendime më të mëdha se 5 për qind. Nuk kemi menduar ende që të bëjmë koalicione zgjedhore. Por, ajo që kemi menduar është që ne do të jemi, dhe i ftojmë të gjithë, ta provojmë forcën tonë politike dhe ta provojmë legjitimitetin”, ka thënë Kuçi.

Pikë tjetër e rendit të ditës, në mbledhjen e këshillit drejtues të Partisë Demokratike të Kosovës ka qenë edhe përgatitjet për zgjedhjet e parakohshme.

commentFirst article
Sot mund të lexoni Shfletoni kopertinat