Ish-kryetarja e degës së LDK-së në Gjermani, Donika Gërvalla, e cila për 27 vite ishte pjesë e LDK-së, ka reaguar përmes një shkrimi në Facebook, lidhur me aderimin e ish-komandantit të Koshares, Hisen Berisha, në radhët e Partisë Demokratike të Kosovës.
Donika Gërvalla përmes një shkrimi të shkurtër në llogarinë e saj, e ka quajtur si të trishtueshëm veprimin e Berishës.
“Sa trishtuese kjo fotografi...”, shkruan Donika Gërvalla, në fotografinë ku shihen Hisen Berisha dhe Kadri Veseli.
Kujtojmë se kandidati i PDK-së për kryeministër, Kadri Veseli bëri të ditur se i është bashkuar ish-komandanti i Batalionit I të Brigadës “Agim Ramadani”, Hisen Berisha.
Kreu i PDK-së, ka shkruar në faqen e tij në Facebook se bashkë mijëra të rinj që po i bashkohen PDK-së dhe vizionit të tij, do ta ndërtojnë të ardhmen e qytetarëve.
