Shefi i Shtabit në Betejën e Koshares, Anton Çuni, ka bërë një kategorizim të gjendjes së ish-ushtarëve të UÇK-së, pas luftës në Kosovë.
Në Rubikon të KTV-së, ai ka thënë se nuk ka ndonjë statistikë ekzakte në lidhje me gjendjen e ish-luftëtarëve, duke filluar nga vendi ku jetojnë, punësimi e risocializimi i tyre.
Kësisoj, ai ka thënë se mundet të flasë vetëm me terma të përgjithshëm.
“Shumë prej tyre janë të kyçur në jetën politike e sociale. Një pjesë e tyre merren me afarizëm dhe përgjegjësi të tjera. Është edhe një kategori që pas luftës nuk kanë arritur të gjejnë vetën, ose nuk kanë arritur të risocialzohen, e ndoshta janë buzë varfërisë dhe sot luftojnë për ekzistencë”, ka thënë Quni.
Veçmas për këtë kategorinë e fundit, Quni ka thënë adresat janë të shumta, por së pari janë ato institucionale.
Ai ka thënë se fillimisht sa Kosova administrohej nga bashkësia ndërkombëtare, institucionet e Kosovës nuk është se kanë pasur shumë të bëjnë me këto kategori.
“Kjo temë fillon të sensibilizohet pas shpalljes së pavarësisë, kur institucionet i marrin kompetencat në dorë, veçmas Ministria e Mirëqenies Sociale e deri te Ligji për Veteranët i miratuar në Kuvendin e Kosovës”, ka thënë Quni, ish-deputet e tash kandidat për të qenë sërish deputet nga radhët e LDK-së.
“Rezultoi me një numër të ekzagjeruar të veteranëve. Sot ka lider të partive politike që e mbrojnë këtë numër, dhe të tjerë që thonë se ky numër është i ekzagjeruar”, ka thënë tutje ai.