Analisti politik, Artan Muhaxhiri ka thënë se në debatet e partive politike pjesën dërmuese po flitet për të shkuarën.
“Nëpër debate që janë platforma më e përshtatshme për t’i prezantuar qëndrimet nuk po bisedohet për të ardhmen. E pamë me të gjitha partitë se rreth 70-80 përqind të kohës merren me të kaluarën dhe vetëm 20 % me të ardhmen. Rrallë ndodhë që një lider ta ketë një premtim”, ka thënë Muhaxhiri.
Muhaxhiri ka thënë në Analiza Zgjedhore se kandidatja e LDK-së për Kryeministre, Vjosa Osmani mund ta ketë një plan B për krijimin e Qeverisë me mbi 80 numra.
“Osmani gjithë atitudën e saj publike e ka krijuar duke kundërshtuar PDK-në dhe Hashim Thaçin. Simpatinë e votuesve të LDK-së e ka fituar me këtë qasje. Gjithë kapitali i saj politik është krijuar duke kundërshtuar PDK-në dhe Thaçin”.
“Tani ajo është në pozitë krejt tjetër. Nuk besoj që do ta ketë përkrahjen ndërkombëtare për krijimin e një qeverie pa 80 vota. E dyta është, mendoj se zonja Osmani mund ta ketë një plan B”.
“Pasi është e re në moshë e sheh vetën në politikë për një dekadë ose dy. Ajo mund ta ketë planin B që nëse ndodhë imponimi i madh i ndërkombëtarëve – edhe nëse i fiton zgjedhjet dhe presioni bëhet i madh që të bëhet një koalicion ku është edhe PDK që të arrihet 80 votëshi. Ekziston mundësia që zonja Osmani të tërhiqet nga kërkesa për t’u bërë Kryeministre”.