Policia Kosovës ka realizuar planin policor për garantimin e sigurisë së përgjithshme gjatë procesit të djeshëm zgjedhor
Në komunikatën e drejtuar mediave, policia ka njoftuar se plani operativ për mbarëvajtjen e procesit zgjedhor, që kishte qëllimin e ofrimit të sigurisë dhe mabjtjen e rendit, qetësisë dhe sigurisë publike, është realizuar me sukses.
Para, gjatë dhe pas procesit zgjedhor në Kosovë, policia ka marrë masa ndaj të gjithë atyre që kanë bërë vepër penale kundër të drejtës së votimit dhe atyre që bien ndesh me ligjet e vendit.
Duke u bazuar në informacionet zyrtare, janë evidentuar disa raste të prishjes së rendit zgjedhor, ku 29 persona janë arrestuar, 23 prej tyre janë ndalur me vendim të Prokurorëve competent të Prokurorisë së Shtetit.
Policia njofton se procesi zgjedhor ka kaluar i qetë dhe pa incidente madhore, të cilat nuk kanë ndikuar në mbarëvajtjen e procesit zgjedhor.
Deklarata e plotë:
Policia e Kosovës, realizoi me sukses planin operativ për mbarëvajtjen e procesit zgjedhor, që kishte për qëllim ofrimin e sigurisë si dhe mbajtjen e rendit, qetësisë dhe sigurisë publike në vend para-gjatë dhe pas procesit të zgjedhjeve në tërë territorin e Republikës së Kosovës.
Pjesë e planit policor ka qenë edhe inicimi dhe procedimi i çdo vepre penale kundër të drejtës së votimit dhe ndërmarrja e të gjitha masave procedurale/penale ndaj çdokujt që bie ndesh me ligjet e vendit, që sanksionojnë veprimet e kundërligjshme ndaj zgjedhjeve të lira dhe demokratike.
Referuar informacioneve zyrtare janë evidentuar disa raste të natyrave të ndryshme të cilat kanë rezultuar me arrestimin e 29 personave që ndërlidhen me rastet e procesit zgjedhor, ku prej tyre 23 persona janë ndaluar me vendim të Prokurorëve kompetent të Prokurorisë së Shtetit.
Vlen të theksohet se vlerësuar në aspektin e sigurisë në përgjithësi procesi zgjedhor ka kaluar i qetë dhe pa incidente madhore, të cilat në një mënyrë apo tjetër nuk kanë ndikuar në mbarëvajtjen e procesit zgjedhor.
Policia e Kosovës mbetet e përkushtuar në garantimin e rendit kushtetues, krijimin e një ambienti të qetë dhe të sigurt për të gjithë qytetarët, duke përfshirë mbrojtjen e të drejtave njerëzore në përgjithësi deri në përfundim të gjithë procesit zgjedhor.
