Njeriu i dytë në Lidhjen Demokratike të Kosovës, Agim Veliu, po shprehet më i butë në deklarata sa i përket marrëveshjes LDK-Vetëvendosje, se partneri i tij në parti, Lutfi Haziri. Veliu që së bashku me Hazirin patën qenë më të zëshmit kundër një koalicioni parazgjedhor LDK – VV, në një prononcim ka thënë që nuk e di ku po ngecin bisedimet e se pa një marrëveshje mes dy partive, vështirë se do të ketë kryeministër e qeveri.
Nënkryetari i parë i Lidhjes Demokratike të Kosovës, Agim Veliu, nuk ka komentuar deklaratat që bënë bujë gjatë vikendit, ku Lutfi Haziri e vinte në tryezë të diskutimit edhe një herë pozitën e kryeministrit të ardhshëm.
Derisa Haziri deklaroi se kryeministri do të kalojë kah zyrat e LDK-së, Agim Veliu thotë se të dy partitë duhet të arrijnë një marrëveshje, në të kundërtën nuk do të ketë qeveri e as kryeministër.
“Po masi ka ardhë puna këtu, duhet me ba një marrëveshje, pa e bë një marrëveshje zor me pas kryeministër e qeveri”, ka thënë Veliu i pyetur për diskutimet e fundit me tone të larta në mes të partive.
Agim Veliu ka thënë se deri më tani është punuar për harmonizim të programit e të qëndrimeve, mirëpo, çështjet tjera si ajo e kryeministrit do të diskutohen në nivel më të lartë politik.
“Duhet me u bë një marrëveshje, duhet me u ulë njerëzit me ba marrëveshje, deri tash kanë punu këto ekipet teknike për harmonizim të programeve të qëndrimeve që nuk janë të afërta ka pas punë aty me u harmonizu disa gjëra pastaj me kalu në atë çështje të nivelit më të lartë politik”, ka thënë nënkryetari i parë i LDK-së.
Megjithatë, i njëjti po thotë se nuk po e di se ku po ngecin bisedimet.
“Nuk e di ku po ngecin këto bisedime, nuk e di s’kam marrë pjesë”, shton ai.
Veliu për Express nuk ka pranuar që të komentojë deklaratën e Lutfi Hazirit që gjatë vikendit nxiti reagime të shumta kur tha se emri i kryeministrit të ardhshëm kalon ka zyrat e LDK-së.
Duke mos folur as sa u përket pretendimeve e vënies në diskutim të pozitës së presidentit të ardhshëm si pjesë e marrëveshjes LDK – VV, Veliu vetëm ka thënë se nuk i ka mbetur hatri që Mustafa e emëroi Hazirin e jo atë në ekipin negociator për harmonizim të programeve.
“Atë e ka sqaru kryetari Mustafa emërimin e tij, mirë e ka sqaru, asnjë fije s’më ka met hatri”, ka deklaruar Veliu.
Nënkryetari i parë i LDK-së, pati qenë fort i zëshëm kur pas dorëheqjes së Ramush Haradinaj nga pozita e kryeministrit, diskutohej që LDK-ja e partia e Albin Kurtit të shkonin së bashku në zgjedhje.
Veliu nuk ishte dukur i lumtur as kur Vjosa Osmani ishte propozuar nga Isa Mustafa si e nominuar për kryeministre nga LDK-ja. Madje, ai në një përgjigje kishte dhënë deklarata të forta kundër saj e koalicionit me Vetëvendosjen.
