Kryetari i OVL të UÇK-së, Hysni Gucati, ka thënë se Albin Kurti, që fitoi në zgjedhjet e 6 tetorit, me deklaratat sa ishte në opozitë ka obliguar veteranët që t’ia kërkojnë ndaljen e Gjykatës Speciale.
Megjithatë, sipas tij, kjo do të jetë e pamundshme. Sipas tij, kjo është edhe më e vështirë për shkak të koalicionit që pritet të bëjë VV-ja me LDK-në, “pasi LDK-ja bashkë me presidentin Hashim Thaçi e kanë sponsorizuar Gjykatën Speciale”.
“Albin Kurti në Kuvend ka thënë se nëse hyn në qeveri do të mundohet ta ndalë Gjykatën Speciale e s’do t’i lë veteranët t’i përgjigjen të shkojnë kështu që ai na obligon ta bëjmë atë që të mos na thotë kryeministri në detyrë ja s’kanë bërë kërkesë. E di që e ka të pamundur sepse ata veç i kanë marrë parametrat e vetë dhe se di që koalicioni, të cilin janë duke e bërë do të ketë problem sepse LDK-ja ka qenë bashkë me presidentin e vendit, Hashim Thaçin që e kanë sponzorizuar Gjykatën Speciale. Do ta ketë problem ta heqë”, ka thënë Gucati.
Ai ka thënë se nuk i përjashton edhe protestat ndaj Speciales.
“Organizata e Veteranëve nuk do të rri duarkryq, në bazë të situatës, ne do ta vlerësojmë situatën dhe gjendjes në të cilën jemi, edhe pse ne e kemi shumë problem meqë këtë Gjykatë e kanë votuar deputetët tonë dhe na kanë lidhur duart këta, jemi të palëvizshëm në këtë drejtim. Ne nuk i përjashtojmë protestat. Nuk do të thotë që do të bëjmë, por as që do të rrimë pa bë protesta”, ka deklaruar më tej ai.