Nisma për Kosovën ka reaguar pas komunikatës së Lëvizjes Vetëvendosje.
Skënder Reçica nga ky subjekt politik, thotë se komunikata e LVV-së është kërcënim ndaj institucioneve të drejtësisë.
“Lëvizja Vetëvendose me këtë deklaratë drejtpërdrejtë kërcënon gjyqtarët dhe tregon se ata nuk e dinë çka është shteti dhe drejtësia. Veprimet e saja nuk kanë lidhje me demokracinë, ligjin dhe kushtetutshmërinë”, shkruan Reçica në Facebook, transmeton gazeta “Bota sot”.
Ai tutje akuzon LVV-në se po e kërcënon shtetin ligjor ende pa e marrë drejtimin e shtetit.
Lexojeni shkrimin e plotë:
Komunikata e LVV-së është kërcënim i drejtpërdrejtê ndaj institucioneve të drejtësisë.
Thuhet se sulmi është mbrojtja më e mirë. Atë po e bënë edhe LVV-ja.
Lëvizja Vetëvendose me këtë deklaratë drejtpërdrejtë kërcënon gjyqtarët dhe tregon se ata nuk e dinë çka është shteti dhe drejtësia. Veprimet e saja nuk kanë lidhje me demokracinë, ligjin dhe kushtetushmërinë.
Ata mendojnë se shteti është parti apo partia është shteti!
Çfarë shprese për ndryshim është kjo, kur ende pa marrë drejtimin e shtetit, frikëson e kërcënon shtetin ligjor. Ajo nuk po tregon sesi ndërtohet shteti i së drejtës, por si kapet shteti dhe institucionet e pavarura të tij.
Pra ky është angazhim konkret në kapjen e shtetit!
Pikërisht, Vetëvendosje është partia e fundit në Kosovë që mund të flasë për pastërti elektorale, veçanërisht pas tentimit të turpshëm për të kontrabanduar pakot nga Serbia dhe për të grabitur mandate.