Kurti: Edukimi i fëmijëve është e drejtë kushtetuese

Aktuale

Kurti: Edukimi i fëmijëve është e drejtë kushtetuese

Më: 20 nëntor 2019 Në ora: 12:16
Albin Kurti

Kreu i Lëvizjes Vetëvendosje, Albin Kurtin, ka deklaruar se duhet të respektohen të drejtat e fëmijëve.

Kryetari i Lëvizjes Vetëvendosje, Albin Kurti, deklaroi se Kosova duhet të respektojë detyrimet që rrjedhin nga Konventa për të Drejtat e Njeriut dhe t’i ofrojë fëmijëve më shumë mundësi për edukim dhe mirëqenie.

“Fëmijës i duhet strehimi, kujdesi nga familja, shteti dhe komuniteti. Asnjë fëmijë nuk e meriton të mbetet pa kulm mbi kokë, e pa arsimim cilësor. Shteti duhet t’ia garantoj zhvillimin, mirëqenien dhe edukimin”, tha Kurti.

Sot kur janë mbushur 60 vjet nga Deklarata për të Drejtat e Fëmijëve e miratuar nga Asambleja e Përgjithshme e OKB-së dhe 30 vjet nga Koventa për të Drejtat e Fëmijëve, Kurti tha se edukimi i fëmijëve është e drejtë Kushtetuese dhe se çerdhet nuk janë luks por nevojë.

Ai tha se prioritet i qeverisjes së re do të jetë edukimi i hershëm dhe se sa më shumë ngritje të cilësisë nëpër çerdhe e shkolla aq më pak fëmijë që kërkojnë lëmoshë.

“As 5% e fëmijëve të moshës nën 5 vjeç në Kosovë nuk janë të përfshirë në edukimin parashkollor. Edukimi i fëmijëve është e drejtë kushtetuese. Çerdhet nuk janë luks por nevojë. Ato janë e drejtë e garantuar për të gjithë fëmijët, pa dallim gjinie, etnie, prejardhjeje apo besimi fetar. Prioritet i qeverisjes së re do të jetë edukimi i hershëm. Sa më shumë ngritje të cilësisë nëpër çerdhe e shkolla aq më pak fëmijë në rrugët e qytetit që punojnë për mbijetesë ose kërkojnë lëmoshë”, vijoi Kurti.

Kreu i VV-së dhe kandidati për kryeministër tha se kemi aq shumë papunësi në Kosovë ndërkaq çdo i dhjeti fëmijë punon.

Ai kërkoi angazhim nga të gjithë që vizioni i shtetit demokratik e social, të drejtë e zhvillimor, të realizohet nën buzëqeshjen e të gjithë fëmijëve të Kosovës.

commentFirst article
Sot mund të lexoni Shfletoni kopertinat