Vajza e Xhemail Mustafës, drithërueshëm pyet: Ku janë njerëzit që kanë dhënë urdhër për vrasjet e tyre? - Bota Sot
Vajza e Xhemail Mustafës, drithërueshëm pyet: Ku janë njerëzit që kanë dhënë urdhër për vrasjet e tyre?

Aktuale

Vajza e Xhemail Mustafës, drithërueshëm pyet: Ku janë njerëzit që kanë dhënë urdhër për vrasjet e tyre?

Më: 5 dhjetor 2019 Në ora: 17:11
Xhemail Mustafa

Me 23 nëntor janë bërë 19 vite nga vrasja e gazetarit dhe veprimtarit të LDK-së, Xhemail Mustafa, e për këtë vrasje ende askush nuk është dënuar. Gazetari Xhemail Mustafa bënë pjesë në mesin e 15 gazetarëve të cilët janë vrarë e për ta nuk është dënuar askush, madje katër prej tyre vazhdojnë të jenë të zhdukur.

Sot familjarët e gazetarëve të vrarë dhe Asociacioni i Gazetarëve të Kosovës, në një konferencë të organizuar për gazetarët e zhdukur dhe të vrarë në Kosovë për periudhën 1998-2005, kanë kërkuar drejtësi dhe që urdhërdhënësit e këtyre vrasjeve të vihen para drejtësisë.

Beriana Mustafa, vajza e gazetarit të vrarë Xhemail Mustafa, ka deklaruar se si familjarë e- kanë vetëm një pyetje, se ku është drejtësia dhe ku janë njerëz të cilët kanë dhënë urdhër për vrasjen e babait të saj.

Për të është e pakuptimtë që për vrasjen e babait të saj 19 vite pas ende nuk është dënuar askus

“Po flasim për njerëz, nuk po flasim për statistika të cilat i mbushin raportet e një organizate ose një mekanizmi. Po flasim për njerëz të cilët përveç që kanë pasur jetë të tyre personale ose karrierë qoftë politike, qoftë gazetareske, pavarësisht begrandit të tyre etnike, janë njerëz që prapa vetës kanë lënë familje. Familje të cilat sot fatkeqësisht qoftë 20 vite, qoftë 19 vite, qoftë 15 vite, e kanë veç një pyetje në kokë, ku është drejtësia, ku janë njerëzit të cilët kanë dhënë urdhër për vrasjen e tyre. A është e mundur që në një Kosovë kaq të vogël, pa dashur me e amnistua hiç institucionet vendore, ku është komuniteti ndërkombëtar që ka shpenzuar miliarda euro në resurse njerëzore për ngritjen e institucioneve të Kosovës, ku janë ata të cilët sot, në një Kosovë 1.8 milionë qytetarë nuk kanë arritur me e vu para drejtësisë vetëm një rast të një gazetari të vrarë”, tha ajo.

Ajo tha se të flasësh për vrasjen e gazetarëve, të kërkosh drejtësi për ta nuk është vetëm obligim moral, por sipas saj, është e drejtë bazike. Mustafa tha se nuk mundesh me e privuar nga jeta dikë vetëm pse mendon ndryshe nga ti, vetëm pse shkruan ndryshe nga ti.

E bija e Xhemail Mustafës, tha se në emër të një qetësie në Kosovë, institucionet ndërkombëtare dhe vendore kanë bërë pazare shumë të mëdha që këto vrasje të mos zbulohen.

Ajo tha se për ta si familjarë është e rëndësishme të dihet se kush dhe pse i vrau më të dashurit e tyre.

Shfaq komentet
comments powered by Disqus
Sot mund të lexoni Shfletoni kopertinat