Sindikata e Policisë së Kosovës, është shprehur e pakënaqur me vendimin e Gjykatës Kushtetuese për pezullimin e Ligjit të Pagave.
Nënkryetari i Sindikatës së Policisë së Kosovës, Shaban Tasholli, ka folur lidhur me pezullimin e Ligjit të Pagave nga Gjykata Kushtetuese.
Tasholli tha se kjo sindikatë është e pakënaqur me këtë vendim të kësaj gjykate.
”Jemi të pakënaqur. Për dy vite ne kemi punuar në këtë ligj së bashku me Qeverinë, menaxhmentin e policisë,Ministrinë e Punëve të Brendshme. Ne nuk e kemi pritur mirë vendimin e Gjykatës Kushtetuese. Ne i kemi bërë thirrje Gjykatës që mos ta merr vendimin, ta shikoj ligjin”, tha Tasholli për Klan Kosova.
Ai u shpreh se nesër Sindikata e Policisë do të mbajë Këshillin Drejtues, ku në bashkëpunim me dy sindikatat e tjera atë të shëndetësisë dhe arsimit do të vendosin për hapat e mëtutjeshme.
“Ne nesër e kemi takimin e Këshillit dhe do të vendosim për hapat e mëtutjeshëm. Do të kemi takime edhe me Sindikatën e Shëndetësisë dhe asaj të Arsimit”, shtoi Tasholli.
Sindikata e Policisë prej kohësh ka kërkuar zbatimin e këtij ligji, duke kundërshtuar anulimin e tij.
