Dënohen me para rusët e ndaluar në Kosovë

Aktuale

Dënohen me para rusët e ndaluar në Kosovë

Më: 15 janar 2020 Në ora: 14:24
Policia e Kosovës - foto arkivi

Dy shtetasit rusë, që u ndaluan në veri të Kosovës për kalim të paligjshëm të kufirit Serbi-Kosovë, u dënuan me nga 250 euro gjobë dhe do të largohen nga Kosova, bëri të ditur për Radion Evropa e Lirë kryetari i Gjykatës Themelore të Mitrovicës, Nikolla Kabashiq.

Përveç dënimit të shqiptuar, atyre iu kërkua të paguajnë edhe shpenzimet e gjyqit.

Policia e Kosovës i arrestoi dy shtetasit rusë - një burrë dhe një grua - më 13 janar.

Sipas burimeve të Radios Evropa e Lirë, ata u kanë thënë autoriteteve të Kosovës se kanë synuar të arrijnë në Llukovska Banja - qendër rehabilituese në jug të Serbisë, në afërsi të vendkalimit kufitar të Jarinës - dhe se sistemi i navigimit i ka dërguar gabimisht në kufi me Kosovën.

Prokurori i Prokurorisë Themelore në Mitrovicë, Sllobodan Bakiq, ka thënë se dy rusët fillimisht kanë bërë përpjekje të kalojnë vendkalimin kufitar Jarinë, porse, për shkak të mungesës së vizave, janë kthyer.

Pas përpjekjes së sërishme për të shkuar në banjë, ata kanë shfrytëzuar rrugë alternative dhe kanë hyrë në Kosovë, ku më pas janë kapur nga policia.

Prokurori i ka identifikuar ata si Egor Igoreviq (Igor Krasikov) dhe Marina Vladimirovna Krasikova.

commentFirst article
Sot mund të lexoni Shfletoni kopertinat