Kryetari i Lidhjes Demokratike të Kosovës, Isa Mustafa këmbëngul që pozita e Kryetarit të Kuvendit duhet t’i takojë LDK’së. Ndërsa po president, ai tash thotë se ‘nuk do të jetë i LDK’së, por i Kosovës’.
Në një intervistë për televizionin publik ai ka shpalosur detaje për takimet me partinë e Albin Kurtit.
“Në qoftë se ju e keni kryeministrin, ne duhet ta kemi krye-parlamentarin”, ka thënë Mustafa.
“Për sa i përket çështjes së presidentit, ai s’do të jetë president i LDK-së por i Kosovës”, ka thënë ndër të tjera Mustafa.
Ai thotë se asnjë subjekt politik nuk është pa të meta, ndërsa i përmend një bashkëpunim, që sipas tij e ka pasur Lëvizja Vetëvendosje me Partinë Demokratike të Kosovës.
“S’ka parti që s’ka behane. Mu më ka rrëzu VV-ja. VV-ja s’do të mund ta merrte Prishtinën kurrë po mos ta kishte përkrahjen e PDK-së”, ka thënë ai.
“Unë personalisht e kam vullnetin që të bëhet marrëveshje. Nëse s’mundemi, atëherë duhet të lëshojmë rrugë dhe hapësirë…”, është shprehur ai.