Ditë më parë, Presidenti Thaçi u takua me kryetarin e Lëvizjes Vetëvendosje, Albin Kurtin.
Takimi zgjati pak minuta e për rrjedhoj nuk pati ndonjë gjë të re. Por, kuptohet se Thaçi ka nënshkruar dekretin e tij për nominimin e kreut të Vetëvendosjes për kryeministër të Republikës së Kosovës. Por për çudi, këtë dekret thotë se e ka mbajtur në tavolinën e tij. Nuk ia paska treguar as të nominuarit, të cilin atë ditë e kishte në zyrë.
Publicisti Enver Bytyçi, për “Bota sot”, theksoi se këtu në këtë situatë, sheh një gërshetim intrigash dhe skemash anti-shtet të presidentit të vendit. Më së paku ka transparencë në marrëdhëniet politike dhe ushtrimin e kompetencave kushtetuese nga ana e zotit Thaçi. Kjo sepse ai ka lënë të kuptojë që afati i këtij mandatimi skadon deri me datën 21 janar, dmth sipas tij, pas dy javësh.
“Nëse keni vënë re, Thaçi e motivon këtë akt me domosdoshmërinë dhe nevojën që Kosova ka për krijimin e institucioneve. Ndërkaq me iniciativat e tij proserbe për ndarjen e Kosovës donte që t’i zhbënte këto institucione njëherë e përgjithmonë. As këshilltarët e tij nuk e besojnë se atij i ha barku për institucionet e vendit. I vetmi hall që ai ka, ka të bëjë me pushtetin e tij. Hashim Thaçi nuk e do koalicionin VV-LDK. Prandaj intrigon dhe në intrigën e tij përdor pushtetin e vet”, tha ai.
Më tej, Bytyçi, shtoi se Thaçi, ka mobilizuar për qëllimet e tij të mbrapshta gjithë thaçistët në Lidhjen Demokratike e në Vetëvendosje.
Sipas tij, kjo shpjegon dhe përgjigjen e pyetjes përse nuk po gjendet kompromisi. Shkaku kryesor i mungesës së këtij kompromisi ka të bëjë Hashim Thaçin dhe përpjekjet e interesat e tij për ta sabotuar këtë koalicion.
“Nga ana tjetër ka të bëjë deri diku edhe me frymën majtiste të Albinit. Kam përshtypjen se ai vuan nga sëmundja e kapjes së pushtetit, sëmundje kjo e të gjitha rrymave majtiste ekstreme kudo në botë. Kam idenë se ai nuk do ta lëshojë as postin e presidentit, sepse ia ka premtuar atë post Rexhep Qosjes! Nisur nga ky arsyetim, mund të them se që tani kryeministri i nominuar Albin Kurti po e pengon Albin Kurtin e fushatës parazgjedhore për ta bërë realitet angazhimin e tij për luftën kundër korrupsionit. Një kryeministër që kërkon të kontrabondojë postet shtetërore, nuk mund të jetë i aftë të luftojë kundër lidhjeve të pushtetit të tij me korrupsionin dhe krimin e organizuar”, tha ai.
Tutje, Bytyçi, theksoi se për sa i takon takimeve para ose përfundimtare të Kurtit dhe Isa Mustafës, mendoj se kjo ka të bëjë më shumë me Mustafën, të cilin e konsideroj bashkëpunëtor të Hashim Thaçit.
Sipas tij, ai qëllimisht ka vënë kusht marrjen e postit të kreut të kuvendit, që të mos formalizohet koalicioni. Gjykoj se LDK duhet të heqë dorë nga kërkesa për kreun e Kuvendit dhe Albin Kurti duhet të lëshojë postin e presidentit të Republikës. Posti i presidentit duhet t’i takojë Lidhjes Demokratike, me kusht që atë të mos e trashëgojnë thaçistët. Po të ishte për thaçistët, më mirë është të mbetet Hashimi në atë post.
“Në rrethanat e krijuara duket se Kosova do të shkojë në një krizë institucionale të pashmangshme. Nëse Thaçi do të shpallë përfundimin e mandatimit të Albin Kurtit dhe dhënien e mandatit të formimit të qeverisë partisë së dytë, Lidhjes Demokratike, atëherë Kosova mund të shkojë në anarki. Ndoshta presidenti i vazhdon të punojë sipas axhendës serbe të destabilizimit të Kosovës! Shpresoj që të ketë vënë mend nga dështimi i hidhur në përpjekjet e tij për ndryshimin e kufijve të Kosovës. Shpresoj gjithashtu t’i ketë shkëput lidhjet e tij me kryeministrin e Shqipërisë, Edi Rama, i cili vijon të punojë sipas axhendës së Beogradit”, përfundoi ai.
