Sot përfundon ‘ultimatumi’ që kryetari i Lidhjes Demokratike të Kosovës Isa Mustafa, ia ka dhënë kryetarit të Lëvizjes Vetëvendosje Albin Kurtit, për të arritjen e një marrëveshjeje për koalicionin qeverisës.
Ende nuk është bërë e ditur nëse sot do të mbahet takimi mes dy krerëve, për të vendosur nëse do të ketë marrëveshje ose duhet të shpallet dështimi.
E duke komentuar në lidhje me këtë gazetari Adriatik Kelmendi, ka kritikuar Kurtin dhe Mustafën, për mos arritjen e një kompromisi, përcjell Bota sot.
Kelmendi ka thënë se Kurti e Mustafa, nuk po e kuptojnë se pas datës 4 shkurt, nuk do të mund të vendosin më për Kosovën.
Sipas tij, nëse nuk arrihet kompromisi, të dy liderët me vetëdije të plotë “fatin e Kosovës e dorëzojnë në duar të Thaçit”.
“Çdo arsyetim pas kësaj s’do të çojë peshë. Do t’iu faturohet si pazotësi dhe papërgjegjësi”, ka shkruar ai në një postim në Facebook.
Postimi i plotë i Kelmendit:
Sot e diel e lezetshme, taman për Kurtin dhe Mustafën të këqyrin Netflix ose të hedhin dru në oxhak.
Pushim! S’kanë pse të takohen! S’po e kuptojnë se vetëm deri më 4 shkurt këta të dy mund të vendosin për Kosovën.
Nëse nuk e gjejnë kompromisin, përkundër vullnetit të votuesve, më 4 shkurt me vetëdije të plotë fatin e Kosovës e dorëzojnë në duar të Thaçit.
Çdo arsyetim pas kësaj s’do të çojë peshë. Do t’iu faturohet si pazotësi dhe papërgjegjësi.