Kryetari i LDK-së në Prizren, Anton Quni ka folur për prishjen e koalicionit LDK-LVV në Prizren.
Pas lajmit që ky koalicion është prishur ku LVV-ja e Prizrenit e ka akuzuar LDK-në për mospjesëmarrje në seancën e Kuvendit ku u votua për kryesuesit e Kuvendit të Prizrenit dhe humbi kandidati i LVV-së ndaj atij të PDK-së.
E pas kësaj humbje Vetëvendosje ka akuzuar LDK-në dhe ka njoftuar se i erdhi fundi bashkëpunimit.
Por, për këtë çështje kryetari i LDK-së në Priren, Anton Quni ka sqaruar opinionin se si rrodhi ngjarja.
Quni ka treguar se pse nuk kanë marr pjesë në seancë ku u zgjodh kryekuvendari.
Ai thotë se ishin në negociata me LVV që si partner në koalicion të i sqarojnë pozicionet e tyre.
Quni tutje tregon se çfarë kanë kërkuar në ato negociata, pas daljes së Nismës nga koalicioni që ishin më herët.
Postimi i plotë:
E vërteta rreth koalicionit LDK-VV në Prizren
Të nderuar qytetar të Prizrenit, duam ta sqarojmë opinion e gjerë në lidhje me zhvillimet e fundit rreth koalicionit tonë me VV-në në nivel lokal.
Grupi i kuvendarëve të LDK'së në koordinim me kryetarin e degës dhe organet e partisë, sot nuk ka marrë pjesë në seancën për zgjedhjen e kryekuvendarit, për shkak se ne kemi qenë në negociata që si partner në koalicion ti sqarojmë pozicionet tona, pas situatës së re të krijuar në qeverinë lokale, si rezultat i daljes së Nismes nga koalicioni.
Kemi kërkuar nga partneri ynë që të bëjmë shpërndarjen e përgjegjësisë, me bindjen se kjo do ta rriste performancën dhe efikasitetin e shërbimeve karshi qytetarëve prizrenas.
Ne konsiderojmë që koncetrimi i pushtetit tek njëri partner, nuk është praktikë e mirë në demokraci.
Mosgatishmëria për ti dhënë zgjidhje kërkesës tonë, ka rezultuar me pamundësi për koordinim për zgjedhjen e kryesuesit të ri të Kuvendit Komunal.
Lidhja Demokratike e Kosovës, në vazhdimësi ka qenë e hapur për partneritet të sinqert.
Kërkesa për balancimin e përgjegjësisë, ishte në proporcion me përfaqësimin që LDK ka në Kuvendin Komunal dhe i bazuar në faktin e pakontestueshëm se ishim ne që vulosëm fitorën e kryetarit Haskuka, i cili sot vendosi që tash e tutje të rrugëtoi pa ne.
Ne e respektojmë vendimin e tij dhe e falenderojmë për bashkëpunimin që kemi pasur përgjatë këtyre viteve.
Anton Quni
Kryetar i LDK's në Prizren