Naim Bazaj është komandant i brigadës 113 në fshatin Tërrstenik të Drenicës, ku u zhvilluan disa beteja gjatë luftës në Kosovë, e të cilat morën shumë jetë.
Për Bazajn, ky është vend i kujtimeve të shumta, të cilat në vete bartin histori e dhimbje.
Kështu, në mesin e të vrarëve nga fshati Tërrstenik, ishin edhe vëllai e axha i tij.
Pikërisht në këtë vend ranë dëshmorë edhe shumë shokë të tij.
Ky është ‘’Lisi binjak’’, siç e kanë quajtur Naimi me shokët e tij, e që shumë herë ai ka shërbyer si mburojë ndaj armikut.
Momentin e çlirimit të vendit tonë, Bazajn e gjeti me ndjenja të përziera, ku pos gëzimit për vendin e tij, ai ndjeu edhe dhimbje e mall për bashkëluftëtarët e tij, që nuk arritën ta përjetonin këtë moment.
Naimi shumë shpesh i viziton këto varreza dhe vendin ku ka mbrojtur atdheun e tij.
