Ministri i Infrastrukturës dhe Ambientit, Lumir Abdixhiku, ka njoftuar se ka obliguar Komunën e Prishtinës që të bëjë anulimin e vendimit për kushtet ndërtimore për rastin e lagjes në afërsi të Badovcit, përcjell Bota sot.
Përmes një postimi në llogarinë e tij në Facebook, ai ka thënë se Qeveria e Kosovës është e përkushtuar t’i mbrojë resurset natyrore të vendit dhe të dëgjojë zërin e qytetarëve.
Postimi i tij i plotë në Facebook:
Duke u thirrur në Ligjin për Ujërat e Kosovës, mbështetur në Vendimin e Qeverisë për zonat e mbrojtura në Liqenin e Badovcit, Ministria e Infrastrukturës dhe Ambientit ka obliguar Komunën e Prishtinës që të bëjë anulimin e vendimit për kushtet ndërtimore për rastin e lagjes në afërsi të Badovcit.
Qeveria e Kosovës është e përkushtuar t’i mbrojë resurset natyrore të vendit. Mbi të gjitha, është e interesuar të dëgjojë zërin e padëgjuar të aktivizmit qytetar, që këtë herë ishte përcaktues në ngritjen e alarmit me kohë.
