Edhe Komisioni për të Drejtat e Njeriut, Barazi Gjinore, për Persona të Pagjetur dhe Peticione është konstatuar sot kryesuar nga kryetari Rasim Demiri.
Kryetari Demiri shpalosi veprimtarinë e Komisionit, ndërsa më pas anëtarët dhanë propozime për ndryshime të disa ligjeve, të cilat kanë të bëjnë me të drejtat e njeriut, barazi gjinore dhe fushat me të cilat do të merret ky komision.
Anëtari i Komisionit nga Lëvizja Vetëvendosje, Sali Zyba përmendi rendin e ditës për mbledhjen e ardhshme, që sipas tij, duhet të shqyrtohen peticionet e qytetarëve, që paraqesin shqetësime për ta.
Anëtarja e Komisionit nga AAK-ja, Teuta Haxhiu, tha se në këtë mandat do të angazhohen për të drejtat e njeriut dhe ligjet që rregullojnë këtë fushë.
Haxhiu përmendi edhe Ligjin për të pagjetur, e cila tha se është një ligj i kërkuar për katër mandate dhe sipas saj, amandamentimi i këtij ligji është me interes të veçantë, sepse ligji aktual nuk trajton dinjitetshëm familjet e prekura.
Të gjithë anëtarët u pajtuan që Komisioni për të Drejtat e Njeriut dhe Barazi Gjinore, për Persona të Pagjetur dhe Peticione të mblidhet sa më shpejt që është e mundur, ngase, siç u tha, ka shumë çështje nga legjislatura e kaluar, të cilët duhet të trajtohen.