Ish-kryeparlamentari dhe kryetari i Partisë Demokratike të Kosovës Kadri Veseli, ka reaguar pas akuzave të kryeministrit Albin Kurti ndaj presidentit Hashim Thaçi, për “marrëveshjen sekrete” me NATO-n.
Veseli e ka quajtur “shqetësues” faktin që për herë të parë një Kryeministër i Kosovës i cilëson marrëveshjet me NATO-n në kundërshtim me interesat e Kosovës, përcjell Bota sot.
Veseli në një postim në Facebook, ka theksuar se qëllimi i Kosovës është anëtarësimi në NATO dhe jo largimi i tyre nga cilido cep i Kosovës.
Postimi i plotë i Veselit:
Është shqetësues fakti që për herë të parë një Kryeministër i Kosovës i cilëson marrëveshjet me NATO-n në kundërshtim me interesat e Kosovës.
Gjatë luftës sonë çlirimtare, kam qenë vetë dëshmitar i veprimeve të kësaj Aleance, të prirë nga Shtetet e Bashkuara të Amerikës, bashkë me ne, në interes të Kosovës, çlirimit të vendit tonë dhe kthimit të qindra mijëra qytetarëve të Kosovës në shtëpitë e tyre.
Qëllimi ynë është anëtarësimi në NATO dhe jo largimi i tyre nga cilido cep i Kosovës.
Sot, sovraniteti i Kosovës nuk rrezikohet nga NATO dhe marrëveshjet me NATO-n, por nga agresiviteti dhe kërcënimet e Serbisë.
NATO është garanci e sovranitetit dhe integritetit të Kosovës.
