Kryeministri në detyrë Albin Kurti, me rastin e 12-vjetorit të miratimit të Kushtetutës, ka kërkuar respektimin e aktgjykimit të fundit të Kushtetueses që pas 13 prillit masat e ndërmarra kundër përhapjes së COVID-19 të mos bien në kundërshtim me, siç është shprehur ai, ngrehinën aktuale juridiko-kushtetuese të Republikës sonë.
“Kushtetuta e shtetit i paraprinë pushtetit, ajo është si dyshemeja ashtu edhe tavani i qeverisjes demokratike dhe i funksionimit e i rregullimit institucional, por Kushtetuta e Republikës së Kosovës lë aq shumë për të dëshiruar, që nga mënyra e hartimit e deri te mangësitë dhe pabarazitë. Kushtetuta është themel i Republikës vetëm atëherë kur Republika është thelb i Kushtetutës”, shkruan Kurti në Facebook.
Ai ka thënë se kushtetutshmëria është vlerë që duhet respektuar përditë përveçse tekst betimi që shqiptohet një herë.
“ Andaj sot me 9 prill shënojmë ditën e Kushtetutës së Republikës së Kosovës në përvjetorin e saj të dymbëdhjetë. Natyrisht, gjithmonë duke përmbushur obligimin tonë për mbrojtur deri në maksimum jetën dhe shëndetin e qytetarëve tanë, si dhe mirëqenien ekonomike të bizneseve dhe punëtorëve të vendit”, përfundon Kurti.
