​4 policë janë shëruar nga Covid-19, 7 ende vazhdojnë të jetë të infektuar

Aktuale

​4 policë janë shëruar nga Covid-19, 7 ende vazhdojnë të jetë të infektuar

Më: 10 maj 2020 Në ora: 10:42
Ilustrim

Muaji maj ka shënuar rënie drastike të numrit të qytetarëve të prekur me Covid-19, ndërsa është rritur në mënyrë të konsiderueshme numri i të shëruarve nga koronavirusi në Kosovë. Listës së të shëruarve u janë shtuar edhe katër zyrtarë policor të cilët kanë qenë të prekur me Covid-19, ndërsa edhe shtatë të tjerë vazhdojnë të jenë ende pozitiv.

Kështu ka bërë të ditur për kp, Bajram Krasniqi, zyrtar për informim në Policinë e Kosovës, i cili tha se zyrtarët policor që kanë dal negativ aktualisht janë duke qëndruar për disa ditë në vetëizolim.

Krasniqi: 11 policë të prekur me COVID19, 4 janë shëruar, 7 ende vazhdojnë të jenë pozitiv

“Numri i policëve të prekur me COVID është 11 në tërë Republikën e Kosovës. Prej tyre 4 janë shëruar dhe 7 të tjerë vazhdojnë të jenë pozitiv, mirëpo janë në gjendje të mirë shëndetësore...Vazhdojnë edhe një vetëizolim të shkurtër, pastaj ne e kemi një Drejtori të Shërbimeve Shëndetësore në kuadër të Policisë ata tërë kohës përpos mjekëve të IKSHP-së i kanë trajtuar edhe këta dhe besoj që varësisht nga dita e bërjes së testit që kanë dal negativ ata do kthehen edhe në vendet e tyre të punës”, theksoi ai.

Krasniqi dha detaje për 11 zyrtarët policor që janë prekur gjatë kësaj periudhe me COVID19.

Krasniqi: Disa zyrtarë policor janë prekur me COVID19 gjatë transportit të personave

“Disa raste janë prekur gjatë transportit të personave që kanë qenë një rast ka qenë në Malishevë se i biri ka qenë i prekur dhe një rast tjetër e kemi një zyrtare policore e cila ka qenë jashtë vendit në trajnim dhe kur është kthyer ka dal pozitiv. Dhe pesë rastet tjera i kemi në pjesën veriore të Mitrovicës që janë të prekur me COVID”, tha Krasniqi.

Deri tani në Kosovë kanë rezultuar pozitiv 870 persona, prej tyre 653 pacientë janë shëruar ndërsa 28 kanë humbur.

commentFirst article
Sot mund të lexoni Shfletoni kopertinat