Deputeti i LVV-së, Mefail Bajqinovci ka reaguar ndaj kryetarit të LDK-së, Isa Mustafës, pasi ky i fundit nuk i vlerësoi statistikat e UNDP-së, të cilat nxorën Vjosa Osmanin dhe Albin Kurtin si më të pëlqyerit e popullit si dhe qeverinë Kurti si më e vlerësuara ndonjëherë.
Bajqinovci thotë se asnjë qytetar i Kosovës nuk e përkrah një qeveri që shkel Kushtetutën.
“Isë, shefi yt Hashimi, përmes vulës së Gjykatës ka thënë se Qeveria e ka shkelë Kushtetutën”, ka shkruar ndër tjera Bajqinovci në Facebook.
Postimi i plotë:
Po të ndihmojmë pak me i kuptu statistikat dhe me i lexu mesazhet e brendshme të tyre.
Paske thënë si ka mundësi me pas pëlqyeshmëri kaq të lartë një Qeveri që na e paska shkelë Kushtetutën dy herë.
Pra, Isa pak a shumë, ose nën rreshta, e paska nënçmu standardin e vlerësimit të popullit.
Ngo Isë, të jesh i sigurt që populli ynë që ka luftuar aq shumë për liri, pavarësi, shtet e Kushtetutë e të drejta, kurrë nuk e përkrahë një Qeveri që e shkelë Kushtetutën. Pra as Qeveria Kurti nuk e ka shkelë Kushtetutën në kohën e pandemisë.
Isë, shefi yt Hashimi, përmes vulës së Gjykatës ka thënë se Qeveria e ka shkelë Kushtetutën. E në të vërtetë, ashtu siç dekreti presidencial rishkrues i Kushtetutës është antikushtetues, po aq edhe veprimet e Qeverisë për ruajtjen e jetës dhe shëndetit të qytetarëve kanë qenë absolutisht të mbështetura në Kushtetutë.
Prandaj prof, populli nuk po u beson juve, e as institucioneve të drejtësisë që i keni kapur. Kaq e thjeshtë është prof. Shnet.
