(E plotësuar) - Kryetari i Lëvizjes Vetëvendosje, Albin Kurti, i pyetur për deklaratat e presidentit të Kosovës, Hashim Thaçi, lidhur me gjendjen e jashtëzakonshme, ka thënë se kur u kërkua të merrej një vendim i tillë ishin vetëm 19 raste me koronavirus.
Ai në një prononcim për media ka thënë se gjendja e jashtëzakonshme nga presidenti më shumë ishte menduar si një kundërvënie e qeverisjes së mirë që kishte VV-ja, sesa për situatën me pandeminë.
“Gjendja e jashtëzakonshme më shumë është menduar si një kundërvënie e qeverisjes së mirë që kishim ne, sesa që kishte të bënte me pandeminë. Atëherë kur u kërkua shpallja e gjendjes së jashtëzakonshme ishin vetëm 19 të infektuar”, ka thënë ai, duke iu referuar deklaratës së presidentit të Kosovës, Hashim Thaçi, i cili më 17 mars kishte kërkuar që të shpallej gjendje e jashtëzakonshme.
Kjo kërkesë e tij, kishte nxitur përplasje në koalicionin VV-LDK, që për epilog pati rrëzimin e Qeverisë Kurti, pas shkarkimit të ish-ministrit të Punëve të Brendshme, Agim Veliu.
Ndërkaq për manifestimin e 12 qershorit të paralajmëruar nga VV-ja, ai ka thënë se nuk do të jetë protestë.
“Do ta kemi një manifestim në shesh, do ta ruajmë distancën që të tregojmë se e ruajmë vetën. Nuk është protestë është manifestim, tubim”, ka thënë ai.
***
Albin Kurti është fotografuar sot në sheshin Nënë Tereza në Prishtinë, i rrethuar nga qytetarët afër një pike ku bëhet grumbullimi i nënshkrimeve në peticionin e Lëvizjes Vetëvendosje.
Lëvizja Vetëvendosje tash e një javë ka filluar të mbledh nënshkrime për një peticion që kërkon zgjedhje të reja nacionale në Kosovë.
Sot një nga pikat e vendosura për mbledhjen e nënshkrimeve është vizituar nga kreu i LVV-së, Albin Kurti.
Në fotografitë e realizuara nga Lajmi.net, Kurti shihet në sheshin Nënë Tereza i rrethuar edhe nga qytetarë të cilët i kërkuan fotografi.
