Ministri i Mbrojtjes Anton Quni priti sot, në ditën e parë të punës, zëvendësministren e Mbrojtjes nga radhët e komuniteteve jo shumicë, Sadika Kofrc, pas marrjes së detyrës me vendimin e Kryeministrit të Republikës së Kosovës, Abdullah Hoti.
Zëvendësministrja Kofrc shoqërohej edhe nga deputetja e Parlamentit të Kosovës, Duda Bale nga radhët e komunitetit boshnjak.
Në pritje ishin të pranishëm edhe komandanti i FSK-së, gjenerallejtënant Rrahman Rama, sekretari përgjithshëm Faruk Geci dhe shefi i Kabinetit të Ministrit Jashar Ramadani.
Ministri Quni, me këtë rast i dëshiroi mirëseardhjeje zëvendësministres Kofrc, të cilën e njoftoi atë, me procesin e deritashëm të zhvillimit të Ministrisë së Mbrojtjes dhe FSK-së, si dhe me objektivat e përgjithshme për të ardhmen.
Ministri Quni, gjithashtu e njoftoi ministren Kofrc, edhe me integrimin e pjesëtarëve nga radhët e komuniteteve jo shumicë në Forcën e Sigurisë të Kosovës.
Ai e cilësoi si shumë të rëndësishëm emërimin e zëvendësministrit të ri të Mbrojtjes nga radhët e komunitetit boshnjak, dhe të cilën e përgëzoi dhe njëherësh i premtoi bashkëpunim në realizimin e detyrave të përgjithshme.
Nga ana e saj, zëvendësministrja Sadika Kofrc, falënderoi ministrin Quni për pritjen dhe gatishmërinë për ta përkrahur gjatë kryerjes së detyrave si zv. ministre e Ministrisë së Mbrojtjes. Ajo u zotua se do të angazhohet me të gjitha kapacitet e saja në përmbushjen e të gjitha objektivave të Ministrisë së Mbrojtjes dhe FSK-së.
