MPJ sqaron pezullimin e disa vendimeve të ish-qeverisë: S’bëhet fjalë për ambasadorë e konsuj - Bota Sot
MPJ sqaron pezullimin e disa vendimeve të ish-qeverisë: S’bëhet fjalë për ambasadorë e konsuj

Aktuale

MPJ sqaron pezullimin e disa vendimeve të ish-qeverisë: S’bëhet fjalë për ambasadorë e konsuj

Më: 1 korrik 2020 Në ora: 17:51
Meliza Haradinaj-Stublla

Ministria e Punëve të Jashtme të Republikës së Kosovës ka sqaruar raportimet e sotme për pezullimin e disa vendimeve të ish-qeverisë e që ndërlidhen me shërbimin e jashtëm.

Nga MPJ thonë se bëhet fjalë vetëm për pezullim të përkohshëm dhe jo anulim, dhe se në një vendim të tillë nuk përfshihen konsujt dhe ambasadorët.

“Nuk bëhet fjalë për anulim, por për pezullim të përkohshëm të vendimeve për kthim të disa diplomatëve, të nënshkruara nga ish-Qeveria e shkarkuar.Vendimi për pezullim nuk i përfshinë konsujt dhe as ambasadorët”, thuhet në sqarimin e ministrisë që drejton Meliz Haradinaj Stublla.

Nga kjo ministri kanë thënë se secili vendim do të shqyrtohet brenda një afati një javor dhe do të merret një vendim përfundimtar, pa paragjykuar vendimet e mëparshme apo pezullimin aktual të tyre.

“MPJD njofton opinionin se këto vendime do të shqyrtohen veç e veç brenda afatit 7 ditor, dhe se vendimi përfundimtar do të merret pa asnjë paragjykim lidhur me vendimet e mëparshme apo pezullimin aktual të tyre”, thuhet ndër të tjera në reagim.

Lidhur me këtë sot gjatë ditës ka reaguar ish-kryediplomati Glauk Konjufca i cili edhe kishte marrë vendimet për kthimin në Kosovë të disa ambasadorëve dhe konsujve.

“Vendimi i sotshëm i Qeverisë Hoti, pra anulimi i vendimit për kthimin e konsujve të paligjshëm, tregon për orientimin thellësisht të gabueshëm politik të LDK-së. Ky është koncesion kapital me shkelësit e ligjit dhe krimin e organizuar”, ka shkruar Konjufca.

Shfaq komentet
comments powered by Disqus
Sot mund të lexoni Shfletoni kopertinat