Minsitrja e Punëve të Jashtme, Meliza Haradinaj – Stublla ka kujtuar 30 vjetorin nga dita e gurthemelit i shtetësisë së Republikës së Kosovës.
‘’2 Korrik 1990, shënon datë kthese kombëtare, kur Delegatët e Kosovës nënshkruan “Deklaratën Kushtetuese të 2 Korrikut”, nga ku kërkohej më legjitimja - e drejta për t’u njohur dhe ekzistuar barabartë me të tjerët’’, ka thënë Haradinaj në një postim në Facebook, shkruan ‘’Bota sot’’.
Postimi i plotë në Facebook
Kujtesë kolektive: 30 vjet nga dita kur u guxua të hidhet gurthemeli i shtetësisë së Republikës së Kosovës.
2 Korrik 1990, shënon datë kthese kombëtare, kur Delegatët e Kosovës nënshkruan “Deklaratën Kushtetuese të 2 Korrikut”, nga ku kërkohej më legjitimja - e drejta për t’u njohur dhe ekzistuar barabartë me të tjerët.
Në rrethana skajshmërisht të pavolitshme për shqiptarët në Kosovë, nën tytat e regjimit të kohës së ish-Jugosllavisë, ishin zërat e guximit dhe duart që nuk u drodhën të nënshkruanin, atëherë një Deklaratë Kushtetuese, që rrjedhimisht ishte dhe pikënisje e çlirimit.
Heronjtë lindin rrallë, ata jetojnë sa vetë koha.