Në mesin e masave të ndërmarra sot nga Qeveria e Kosovës anti COVID-19, është vendosur që të pezullohet edhe puna e fitneseve, pishinave, shkollave të futbollit dhe sporteve tjera që zhvillohen në ambiente të mbyllura.
Ndërsa, aktivitetet e lartcekura që zhvillohen në ambiente të hapura detyrohen të zbatojnë në përpikëri kushtet e parapara në Manualin për mbrojtje nga COVID-19.
“Pezullohen aktivitetet rekreative, kulturore dhe sportive të mbyllura në të gjithë territorin e Republikës së Kosovës (përfshirë fitneset, pishinat, shkollat e futbollit dhe sportet tjera, trajnimet e kësaj lëmie etj). Të gjitha aktivitetet e lartcekura që zhvillohen në ambiente të hapura detyrohen të zbatojnë në përpikëri kushtet e parapara në Manualin për mbrojte nga COVID-19”, thuhet në vendimin e qeverisë së Kosovës.
Ndryshe, që nga fillimi i pandemisë COVID-19 e deri më tani në Kosovë me virus janë infektuar 4 mijë e 931 persona, 2 mijë e 267 prej të infektuarve janë shëruar kurse janë regjistruar edhe 102 raste të vdekjes të cilët kanë pasur sëmundje tjera shoqëruese.
Instituti Kombëtar I Shëndetësisë Publike në Kosovë ka njoftuar se raste aktive në vendin tonë janë 2 mijë e 562.
