Murtez Kastrati, veteran i Ushtrisë Çlirimtare të Kosovës, është liruar pasi ishte ndaluar nga Policia e Shqipërisë.
Mëngjesin e sotëm policia e Shqipërisë në bazë të urdhërarrestit të Serbisë dorëzuar në INTERPOL, kishte ndaluar ish-luftëtarin e UÇK-së, Murtez Kastratin.
Ministrja e Punëve të Jashtme dhe Diasporës, Meliza Haradinaj-Stublla, ka njoftuar se autoritetet e Shqipërisë, e kanë liruar ish-luftëtarin e UÇK-së, Murtez Kastrati, i cili u ndalua nga policia, pas një kërkese që Serbia kishte dërguar në INTERPOL.
Njoftimi i plotë i Haradinaj-Stubllës:
Me të lexuar njoftimin nga z. Hysni Gucati, rreth ndalimit të ish luftëtarit të Ushtrisë Çlirimtare të Kosovës, z.Murtez Kastratit, kam kontaktuar menjëherë homologun shqiptar z.Gent Cakaj, i cili ka vepruar shpejtë dhe ka sqaruar që z. Kastrati është ndaluar për verifikim dhe liruar para 2 orësh.
Është e papranueshme se si Serbia shtiret ndërkombëtarisht për kinse ‘konstruktivitet’ ndaj Kosovës, ndërsa posa mbyllen dyert e të ashtuquajturit dialog, vazhdon veprimet ilegale kundër Kosovës.
Kërkesat e Serbisë përmes INTERPOL-it duhet të azhurnohen nga autoritet e Shqipërisë, dhe të reflektojnë realitetin politik e ligjor të Kosovës. Do të angazhohemi bashkë me organizatat e dala nga lufta që menjëherë Qeveria, respektivisht MPJD dhe MPB e Republikës së Kosovës, t’u vë në dispozicion autoriteteve të Shqipërisë, listat e veteranëve të Ushtrisë Çlirimtare të Kosovës.
Në bashkëpunim të ngushtë me homologun Cakaj, do të veprojmë konform kompetencave tona ligjore e kombëtare, që të mos lejojmë turpërimin e maltretimin e shqiptarëve para kërkesave të tilla jolegjitime dhe joligjore të Serbisë.
Përkrahja e vlerave të UÇK-së dhe pastërtisë së saj, nuk është vetëm çështje deklaratash!.
Arrestohet veterani i UÇK-së në Shqipëri, Serbia me listë të re me emra të ish-pjesëtarëve të UÇK-së
Kryetari i Organizatës së Veteranëve të Luftës së UÇK-së Hysni Gucati, ka treguar se veterani i UÇK-së Murtez Kastrati, sot është ndaluar nga policia e Shqipërisë pasi që shteti serb ka dërguar emrin e tij në Interpol.
Gucati ka thënë se ka informacione se, Serbia këto ditë ka bërë një listë të re me emra të ish-pjestarëve të UÇK-së, përcjell Bota sot.
Ai ka ftuar shtetin shqiptar që të lirojë sa më parë Kastratin, derisa bashkëluftëtarët i ka porositur që këto ditë të mos lëvizin dhe të mos dalin në shtetet tjera.
Kreu i OVL të UÇK-së, ka thënë se Qeveria e Kosovës sa më parë duhet të marrë masa në këtë drejtim.
Reagimi i plotë i Gucatit në Facebook:
Veterani i UÇK-së Murtez Kastrati sot është ndaluar nga policia Shqipërisë pasi që shteti Serb ka dërguar emrin e tij dhe shumë ish-pjestarëve të UÇK-së në Interpol, nga burimet që kemi marrë Serbia këto ditë ka bërë një listë të re me emra të ish pjestarëve të UÇK-së, ju bëjmë apel bashkluftëtarëve që këto ditë mos të lëvizin dhe të mos dalin në shtetet tjera, Shteti i Shqipërisë duhet sa me parë ta lirojë Murtez Kastratin dhe të mos i marrë parasysh asnjëherë veprimet dhe akuzat e Serbisë të pa baza ndaj Kosovës, derisa do të vazhdojnë kështu duke u maltretuar në këtë formë njerëzit që dhanë çdo gjë që ne sot ta kemi shtetin, veteranët ende nuk janë në gjendje të lëvizin të lirë, Qeveria e Kosovës sa më parë duhet të marrë masa në këtë drejtim dhe të mos kemi më raste të tilla!
HG