Një taksist në Prishtinë po dyshohet se është keqtrajtuar nga policët në stacionin policor Jugu – Drejtoria Rajonale e Prishtinës.
Në orët e para të së mërkurës në lagjen Dardania në Prishtinë është arrestuar një taksist dhe sipas dëshmitarëve pjesëtarët e Policisë së Kosovës gjatë arrestimit të tij kanë përdorur gjuhë të papërshtatshme.
Në lidhje me këtë media ka kërkuar sqarime nga Inspektorati i Policisë së Kosovës (IPK), se çfarë ka ndodhur me këtë rast dhe me policin në fjalë.
Nga IPK-ja kanë bërë të ditur se kanë pranuar një telefonatë se një qytetar dyshohet se është keqtrajtuar në stacionin policor Jugu – Drejtoria Rajonale e Prishtinës.
Sipas IPK-së, taksisti është arrestuar për shkak të mospërfilljes të urdhrave të dhëna nga policia dhe se është duke e trajtuar ankesën e tij për keqtrajtim.
“Inspektorati Policor i Kosovës sot përmes Linjës së Kaltër (numrit të telefonit pa pagesë për qytetarë – 080003333) ka pranuar informatën në se një qytetar dyshohet se është keqtrajtuar në stacionin policor Jugu – Drejtoria Rajonale e Prishtinës. Me të pranuar informacionin hetuesit e IPK-së kanë dalë në vendin e ngjarjes ku kanë pranuar informacionet fillestare nga policia se një qytetar (vozitës taksie) është arrestuar për shkak të mospërfilljes të urdhrave të dhëna nga policia. IPK ka pranuar ankesën e qytetarit në fjalë dhe e njëjta do të trajtohet bazuar në mandatin ligjor të IPK-së”, thuhet në përgjigjen e IPK-së.
Në anën tjetër, zëdhënësja e Policisë së Kosovës për Rajonin e Prishtinës, Flora Ahmeti, ka thënë për lajmi.net, se i ndaluari me udhëzim të prokurorit kujdestar është gjobitur për mospërfillje të urdhrave të Ligjit për Rendin dhe Qetësinë Publike.
“Ngjarja ka ndodhur sot rreth orës 01:00 në lagjen ‘Dardania’. Sa i përket kompetencës së policisë me udhëzim të prokurorit kujdestar palës i është shqiptuar një gjobë për kundërvajtje sipas ligjit 03 L 142, Neni 16, Mospërfillja e urdhrave te ligjshëm”, tha ajo.
