KFOR-i sqaron pse u fut xhandarmëria serbe në Kosovë, jep një paralajmërim - Bota Sot
KFOR-i sqaron pse u fut xhandarmëria serbe në Kosovë, jep një paralajmërim

Aktuale

KFOR-i sqaron pse u fut xhandarmëria serbe në Kosovë, jep një paralajmërim

Nga: A.Zh Më: 8 gusht 2020 Në ora: 17:02
Xhandarmëria serbe në territorin e Kosovës

KFOR-i ka dhënë detaje për publikun, pasi dje në afërsi të fshatit Hodonovc, në komunën e Kamenicës, janë parë duke patrulluar xhandarmëria serbe.

KFOR-i ka sqaruar se ata që nga viti 2008, zhvillojnë patrullime të sinkronizuara me Forcat e Armatosura Serbe përgjatë Vijës Kufitare Administrative për të ofruar siguri dhe për t’u siguruar që nuk ka aksidente.

KFOR ka siguruar se edhe pse vija kufitare me Serbinë nuk është e përcaktuar qartë, xhandarmëria serbe, ka lëvizur përgjatë vijës kufitare me një shkallë përshtatjeje të imponuar nga terreni.

Ata kanë thënë se ishin ushtarët serbë ishin të shoqëruar nga anëtarë të KFOR-i në çdo moment.

KFOR ka paralajmëruar se do të vazhdojë të angazhohet me të gjitha palët për të forcuar bashkëpunimin për të siguruar një mjedis të qetë dhe të sigurt dhe liri të lëvizjes për të gjitha komunitetet në Kosovë, sipas Rezolutës 1244 të Këshillit të Sigurimit të Kombeve të Bashkuara të vitit 1999 dhe Marrëveshjes Teknike Ushtarake të të njëjtit vit.

Reagimi i plotë i KFOR-it:

Më 07 gusht 2020, rreth orës 17:20, elementët e KFOR-it nga Komanda Rajonale Lindje zhvilluan një Patrullë të Sinkronizuar me homologët e Forcave të Armatosura Serbe në Linjën Kufitare Administrative në afërsi të fshatit Hodonovc, në komunën e Kamenicës.

Që nga viti 2008, patrullimet e sinkronizuara zhvillohen në mënyrë rutinore së bashku nga KFOR-i dhe Forcat e Armatosura Serbe përgjatë Vijës Kufitare Administrative për të ofruar siguri dhe për tu siguruar që nuk ka aksidente. Në këtë drejtim, KFOR-i gjithashtu zhvillon patrulla të përbashkëta me Organizatat e Sigurisë së Kosovës në afërsi të Vijës Kufitare Administrative.

KFOR-i bashkëpunon me Organizatat e Sigurisë së Kosovës në të gjithë Kosovën, dhe me Forcat e Armatosura Serbe në Vijën Administrative Kufitare ndërmjet Kosovës dhe Serbisë. Vija Kufitare Administrative shtrihet rreth 350 kilometra dhe nuk është e shënjuar qartë apo e përcaktuar nga elemente të terrenit natyror dhe të identifikueshëm, siç janë lumenjtë ose vargmalet, por është shënuar vetëm në harta.

Ndërsa kryejnë aktivitetet e tyre, patrullimet e sinkronizuara duhet t’i përshtatin itineraret e tyre në kufizimet e terrenit. Kjo nënkupton që patrullat e sinkronizuara të KFOR-it dhe Forcave të Armatosura Serbe lëvizin përgjatë Vijës Kufitare Administrative me një shkallë përshtatjeje të imponuar nga terreni. Sidoqoftë, në asnjë moment elementet e Forcave të Armatosura Serbe të një patrulle të sinkronizuar nuk ndahen nga anëtarët e KFOR-it dhe ky ishte rasti edhe këtë herë.

KFOR-i do të vazhdojë të angazhohet me të gjitha palët për të forcuar bashkëpunimin si me Organizatat e Sigurisë së Kosovës ashtu edhe me Forcat e Armatosura Serbe në përputhje me mandatin e tij për të siguruar një mjedis të qetë dhe të sigurt dhe liri të lëvizjes për të gjitha komunitetet në Kosovë, sipas Rezolutës 1244 të Këshillit të Sigurimit të Kombeve të Bashkuara të vitit 1999 dhe Marrëveshjes Teknike Ushtarake të të njëjtit vit.

Shfaq komentet
comments powered by Disqus
Sot mund të lexoni Shfletoni kopertinat