Çka pret BE-ja nga takimi i shtatorit mes Kosovës e Serbisë? - Bota Sot
Çka pret BE-ja nga takimi i shtatorit mes Kosovës e Serbisë?

Aktuale

Çka pret BE-ja nga takimi i shtatorit mes Kosovës e Serbisë?

Më: 14 gusht 2020 Në ora: 07:14
Avdullah Hoti

Në muajin korrik nëpërmjet një takimi virtual ka rinisur dialogu midis Kosovës dhe Serbisë i cili ishte bllokuar që prej kur Kosova, aso kohe në qeverinë e udhëhequr nga Ramush Haradinaj kishte vendosur 100 për qind tarifë për produktet që vijnë nga Serbia dhe Bosnja e Hercegovina në Kosovë.

Dialogun me Serbinë nuk arriti ta rinisë as ish-kryeministri Albin Kurti i cili vendosi për reciprocitet me Serbinë – gjë që kundërshtohej nga Shtetet e Bashkuara të Amerikës dhe Bashkimi Evropian.

Ishte Avdullah Hoti ai i cili me të ardhur në qeverisje i dha prioritet rifillimit të dialogut. Në korrik u mbajt takimi i parë i nivelit të lartë midis Kosovës dhe Serbisë dhe lidhur me këtë Bashkimi Evropian ia ka kredituar vetës suksesin në një përgjigje.

“Dialogu i asistuar nga Bashkimi Evropian po vazhdon. Ai rifilloi në korrik me dy takime në nivelin më të lartë pas më shumë se 20 muaj ngërçi”, shprehet, Nabila Massrali, Zëdhënëse e BE-së për Punët e Jashtme dhe Politikën e Sigurisë

E pyetur për takimin e shtatorit midis Kosovës dhe Serbisë, Massrali shprehet se ky takim është caktuar me pëlqimin e presidentit të Serbisë, Aleksandër Vuçiq dhe të kryeministrit të Kosovës, Avdullah Hoti.

“Gjatë takimit të nivelit të lartë më 16 korrik, Shefi i BE-së për Politikë të Jashtme dhe Siguri, Josep Borell dhe Emisari Special i BE-së për dialogun Kosovë – Serbi, Miroslav Lajçak u pajtuan me presidentin e Serbisë dhe kryeministrin e Kosovës që të mbajnë një mbledhje të nivelit të lartë në fillim të shtatorit”, tha ajo më tutje.

Në fund, e pyetur për pritshmëritë e takimit të radhës, ajo shprehet se BE po punon drejt normalizimit të përgjithshëm të marrëdhënieve – për të gjitha çështjet e pazgjidhura.

“Bashkimi Evropian si lehtësues i dialogut punon me të gjitha palët drejt normalizimit të përgjithshëm të marrëdhënieve, duke i adresuar të gjitha çështjet e pazgjidhura”, tha ajo

E çështja e dialogut ka përplasur kryeministrin Hoti me partnerët e koalicionit dhe me opozitën në Kuvendin e Kosovës.

Partneri më i madh i Hotit, Aleanca për Ardhmërinë e Kosovës shprehen se kryeministri Hoti ka bërë gabime me dialogun. Madje, zëvendësi i tij, Besnik Tahiri nga radhët e AAK-së ditë më parë tha se: “Hoti ka rënë në mina në dialogun me Serbinë”.

E Partia Demokratike e Kosovës dhe Lëvizja Vetëvendosje kanë akuzuar kryeministrin Hoti se nuk ka përgatitje, platformë e as ekip për të zhvilluar dialogun me Serbinë.

PDK në anën tjetër e sheh si të domosdoshme përfshirjen e Shteteve të Bashkuara të Amerikës në dialog e që aktualisht është jashtë kësaj teme.

Mbetet të shihet se cili do të jetë epilogu i takimit midis Kosovës dhe Serbisë që do të zhvillohet në fillim të shtatorit, por njohësit e çështjeve politike shprehen se dialogu pa presidentin e Kosovës, Hashim Thaçi është në disfavor të Kosovës.

Kjo për arsye se Thaçi është president i vendit dhe gjithashtu sepse Thaçi ka qenë pjesë e procesit të dialogut. Thaçi ka vendosur të mos marrë pjesë në dialog derisa Gjykata Speciale të vendosë për aktakuzën e pakonfirmuar por të publikuar nga Zyra e Prokurorit të Specializuar ndaj tij dhe kreut të PDK-së, Kadri Veseli.

Shfaq komentet
comments powered by Disqus
Sot mund të lexoni Shfletoni kopertinat