Zëvendësministri i Punëve të Brendshme nga LDK-ja Bajram Gecaj, ka thënë se para vrasjes koloneli Ahmet Krasniqi i kishte thënë se ndihej i rrezikuar dhe se kishin gjuajtur në të.
Ai ka thënë se i vetmi person që do të mund ta dëshmonte këtë Agim Mehmeti, nuk jeton më.
“Po thuhet se nuk ka pasur indikacione se ishte i rrezikuar Ministri Ahmet Krasniqi para vrasjes së tij! Unë e them me përgjegjësi të plotë se mua personalisht Ministri Krasniqi ma kishte thënë se ishte i rrezikuar dhe se madje edhe kishin gjuajtur në të! Fatkeqësisht, i vetmi person që do të mund ta dëshmonte këtë, nuk është më në mesin tonë, Zëvendësministri Agim Mehmeti”, ka shkruar Gecaj dje në një postim në Facebook.
Atij për këtë i ka reaguar edhe Sefedin Krasniqi, bashkëpunëtor i ngushtë i kolonel Krasniqit, përcjell Bota sot.
Ai i ka kërkuar Gecajt, që të hapet dosja e kolonelit nga organet përgjegjëse të Shqipërisë.
“Kërko emrin dhe mbiemrin dhe funksionin e personit që i ka paguar 250000 dollarë për vrasjen”, ka shkruar Sefedin Krasniqi në Facebook.
Reagimi i tij i plotë:
Bajram të di për burrë të mirë, por kjo që paske thënë, nuk qëndron plotësisht.
Shumë gjëra janë thënë mirë për kolonelin e shumë të tjeta janë thënë për protagonizëm.
Nuk munda të reagoj në faqen tënde, prandaj e bëra këtu. Si zëvendës ministër i MPB, kërko të hapet Dosja e Ahmetit nga organet përgjegjëse të Shqipërisë.
Kërko emrin dhe mbiemrin dhe funksionin e personit që i ka paguar 250000 $ për vrasjen.