Ish udhëheqësit e LDK-së në Malishevë, Jakup Kastrati dhe Cen Desku, në dosjet e publikuara ty Gjykatës Speciale nga OVL e UÇK-së, figurojnë si persona të vrarë, e faktikisht që të dy janë gjallë.
Kohë më parë, Jakup Kastrati kishte rrëfyer në detaje rastin e burgosjes së tij dhe Cen Deskut.
“Në komunikatë i kemi tri shpifje, tri gënjeshtra të tyre, gjoja se kemi propaganduar për dorëzimin e armëve, gjoja se në bashkëpunim me Agim Krasniqin, anëtar i kryesisë së LDK-së në bashkëpunim e kemi formuar Policinë Speciale dhe gjoja se kemi qenë në lidhje me kolaboracionistë, të cilët ditë më parë u ekzekutuan nga UÇK-ja”, kishte thënë kohë më parë Jakup Kastrati.
Kurse, Cen Desku ka reaguar pas publikimit të dosjeve të Speciales, dhe emrit të tij si person i vdekur.
“Un jam i gjallë, ekzistoj dhe do të jem gjatë. Nuk kam njohuri që jam në ato listat që ka OVL e UÇK-së, si kam parë. Jam kërcënuar edhe prej serbëve edhe prej shqiptarëve, por nuk e kam atë hall. Kam dëshmuar edhe në UNMIK edhe në EULEX, e po ashtu edhe në Gjykatën Speciale. Është e incizuar deklarata ime në Dragobil, do të ishte mirë të dëgjohet por nuk kam mundësi ta sigurojë, se ajo sqaron shumë gjëra”, ka treguar Cen Desku, përcjellë “Bota sot”.