Shoqata e të Drejtave të Pacientëve në Kosovë ka reaguar lidhur me rastin e djeshëm në QKUK, ku u ther me thikë një infermier.
Kjo shoqatë e ka cilësuar këtë sulm si akt qyqar dhe të papranueshëm, ndërsa ka kërkuar që të veprojnë organet e drejtësisë.
“Sulmi me thikë ndaj infermierit në QKUK është një akt qyqar dhe i papranueshëm! Ne e dënojmë atë dhe kërkojmë nga organet e drejtësisë që sa më parë ta vendosin drejtësinë në vend”, thuhet në komunikatën e Shoqatës së të Drejtave të Pacientëve.
“Ne konsiderojmë se profesionistët dhe pacientët armik duhet të kenë sëmundjen e pacientit dhe jo njëri – tjetrin. Besimi në mes të palëve profesionist-pacient është kusht themelor për marrëdhënie të shëndoshë dhe trajtim të suksesshëm”, thuhet tutje në reagim.
Shoqata gjithashtu ka kërkuar që të pushojnë konfliktet e sulmet verbale dhe fizike ndërmjet profesionistëve shëndetësorë dhe pacientëve, duke theksuar se “Situatat konfliktuoze duhet parandaluar jo t’i trajtojmë ato pasi të kenë ndodhur”.
