Haradinaj-Stublla ftohet nga homologu izraelit, zotohet për hapjen e ambasadës në Jeruzalem

Aktuale

Haradinaj-Stublla ftohet nga homologu izraelit, zotohet për hapjen e ambasadës në Jeruzalem

Më: 1 tetor 2020 Në ora: 18:17
Meliza Haradinaj-Stublla dhe Gabriel Ashkenazi

Pas vendosjes së marrëdhënieve diplomatike me Izraelin, Ministrja e Punëve të Jashtme dhe Diasporës Meliza Haradinaj-Stublla ka realizuar telefonatën e parë, që ajo e ka quajtur historike, me homologun e saj nga ky shtet.

Kryediplomatja kosovare ka thënë se me Ashkenazi  kanë diskutuar mbi rëndësinë e vendosjes së marrëdhënieve diplomatike mes Kosovës dhe Izraelit dhe ndikimin e madh që ka kjo marrëdhënie për të dy vendet tona.

Ajo ka thënë po ashtu se janë dakorduar për të zyrtarizuar marrëdhëniet diplomatike midis Kosovës dhe Izraelit në Jeruzalem sa më shpejt të jetë e mundur.

Haradinaj-Stublla deklaroi se e ka konfirmuar qëllimin e Kosovës për të hapur ambasadë në Jeruzalem, derisa ka shtuar se e ka pranuar ftesën e homologut të saj nga Izraeli për të vizituar këtë vend.

Postimi i plotë i Meliza Haradinaj-Stublla në Facebook:

Sot pata telefonatën e parë historike me Ministrin e Punëve të Jashtme të Izraelit Z. Gabriel Ashkenazi, e cila shënon një hap të rëndësishëm përpara në vendosjen e marrëdhënieve diplomatike midis Republikës së Kosovës dhe Shtetit të Izraelit.

Diskutuam mbi rëndësinë e vendosjes së marrëdhënieve diplomatike Kosovës dhe Izraelit dhe ndikimin e madh që ka kjo marrëdhënie për të dy vendet tona, e ndërtuar mbi bazat e miqësisë së jashtëzakonshme midis popujve tanë paqedashës.

E sigurova homologun tim izraelit se Kosova është e përkushtuar me kapacitet të plotë për të ndërtuar bashkëpunim të ngushtë në të gjitha fushat me interes të përbashkët, duke nderuar gjithashtu mikun dhe aleatin tonë të madh të përbashkët, Shtetet e Bashkuara të Amerikës. I konfirmova Z. Ashkenazi edhe qëllimin tonë për të hapur Ambasadën tonë në Jeruzalem.

Pranova ftesën e Z. Ashkenazi për të vizituar Izraelin, dhe së bashku ramë dakord për të zyrtarizuar marrëdhëniet diplomatike midis Kosovës dhe Izraelit në Jeruzalem sa më shpejt të jetë e mundur, dhe vendosëm të shkojmë përpara menjëherë me një grup të përbashkët pune për të materializuar këtë arritje.

Shfaq komentet
comments powered by Disqus
Sot mund të lexoni Shfletoni kopertinat