Ish-ministri i Zhvillimit Ekonomik, Besim Beqaj, ka raportuar në Komisionin Hetimor Parlamentar lidhur me procesin e privatizimit në Kosovë.
Por raportimi i tij ka shkaktuar përplasje mes deputetëve të Vetëvendosjes dhe PDK-së.
E gjitha ka nisur pasi që deputeti i VV-së, Hekuran Murati e pyeti ish-ministrin Beqaj se “çka quajmë treg”, pasi ky i fundit disa here përsëriti se është për privatizimin e aseteve shtetërore, duke e përmendur ekonominë e lirë të tregut.
Por pyetja e Muratit e nervozoi deputetin e PDK-së, Sejdi Hoxha, i cili e pyeti deputetin e VV-së se çfarë lidhje ka pyetja e tij me procesin e privatizimit.
“Çfarë relevance ka kjo me privatizim bre? A e ke ftu me e shti në provim për ekonomi?”, i tha Hoxha deputetit Murati, duke shtuar se “profesor Beqaj na mban ligjëratë për këtë punë”.
Deputetit Murati i reagoi më pas vet ish-ministri Beqaj i cili i tha se anëtarët e këtij komisioni që s’e dinë se çfarë është ekonomia e tregut, mund të shkojnë në fakultetin ku ai ligjëron.
“Besoj që të gjithë duhet ta dini se çfarë është ekonomia e tregut. Për të gjithë ata që nuk kanë njohuri bazike për ekonominë, mund të vijnë në fakultet për ligjërata”, tha Beqaj.
Por kjo deklaratë e Beqajt nuk i pëlqeu fare kryesuesit të komisionit, Hajrulla Çeku i cili ia tërheqi vërejtjen ish-ministrit se po përdor gjuhë fyese ndaj deputetëve.
“Gjuha ofenduese ndaj deputetëve nuk është e lejueshme. Kështu që po ua tërheq vërejtjen një here. Mos më detyroni ta bëj”, tha Çeku.
Ndërsa Murati që e “ndezi” përplasjen tha se pyetja e tij ishte retorike, pasi qëllimi është të arrihet në një konstatim për të parë nëse Beqaj e ka kuptuar si duhet çështjen e tregut.
