Deputeti Mërgim Lushtaku, ka thënë se janë në pritje të vendimit për konfirmim ose refuzimin e aktakuzave nga ana e Dhomave të Specializuara të Kosovës, ndaj Presidentit Hashim Thaçi dhe Kryetarit të PDK-së, Kadri Veseli.
“Nuk përzihemi në çështjet e Drejtësisë. Jemi në pritje të vendimit. E shohim se cili do të jetë vendimi i tyre, nuk do të paragjykojmë. Në besojmë në pafajësinë e tyre, lufta ka qenë ë drejtë, e pastër, luftë për mbijetesë”, është shprehur ai.
Ai në Edicionin Special ka folur për iniciativën e 2018-ës për zhbërjen e Gjykatës Speciale, por që në fund ka thënë kanë vendosur që të mos ndikojnë në punën e saj.
“Ka pasë një tendencë, por në fund jemi pajtuar që nuk do të ndalohet mandati i Speciales. Besojmë në pafajësinë e UÇK-së dhe qytetarët e dinë se Kosova ka qenë viktimë në luftën 1998-1999 dhe që Serbia ka qenë agresori. Partitë kosovare kanë mundur ta luajnë këtë rol dhe Serbia po viktimizohet”.
“Opsioni i ynë i vetëm është të punojmë për vendin. Do të mundohemi që ta mbajmë këtë ritëm”, ka shtuar ai duke theksuar se vet ka treguar mosbesim ndaj Gjykatës Speciale.
