Deputeti i Kuvendit të Kosovës, nga radhët e Lëvizjes Vetëvendosje, Salih Zyba, përmes një postimi në facebook ka reaguar ndaj Qeverisë Hoti, për shuarjen e task-forcës kundër korrupsionit.
Zyba deklaroi se ky veprim është i pasinqertë dhe mashtues në shërbim të qëllimeve dhe përfitimeve të tyre private e të ngushta.
"Shuarja e task-forcës kundër korrupsionit në kohën kur ajo po hetonte anëtarë të koalicionit qeverisës është veprim korruptiv, sikurse është mashtrim arsyetimi se një mekanizëm i tillë ka qenë joligjor", tha Zyba, përcjell "Bota sot".
Postimi i plotë
Sipas definicionit, korrupsioni te ata të cilët bartin funksione e autoritet publik është sjellje ose veprim i pasinqertë ose/dhe mashtues në shërbim të qëllimeve dhe përfitimeve të tyre private e të ngushta. Shuarja e task-forcës kundër korrupsionit në kohën kur ajo po hetonte anëtarë të koalicionit qeverisës është veprim korruptiv, sikurse është mashtrim arsyetimi se një mekanizëm i tillë ka qenë joligjor. Kështu, është i pasinqertë edhe zotimi për ta luftuar krimin dhe korrupsionin. Ai që po i qëndron në ballë një vendimi të tillë është sikurse ata që po synojnë të përfitojnë nga ai vendim, i korruptuar.