Përfaqësuesi i Lartë i BE për Punët e Jashtme Joseph Borel tha se ai pret që administrata e Joe Biden të ketë një partneritet të fortë me BE për të gjitha çështjet, sepse ajo nuk konkurron në Ballkan, veçanërisht kur bëhet fjalë për dialogun midis Beogradit dhe Prishtinës.
Ai tha se Beogradi dhe Prishtina duhet të gjejnë një zgjidhje dhe se BE nuk do ta diktojë atë, si dhe se disa muaj më parë propozimi ishte shkëmbimi i territoreve, shkruajnë mediat serbe, transmeton Bota sot.
- Disa muaj më parë, ishte një propozim për të shkëmbyer territore. Por kjo nuk është më një opsion - tha Borel dhe shtoi se Serbia dhe Kosova duhet të bien dakord, si dhe se ka vende në BE që kundërshtojnë shkëmbimin e territoreve.
Sipas tij, BE dëshiron të jetë një ndërmjetës dhe tani gjërat po shkojnë mjaft mirë.
- Unë drejtova një nga takimet për dialogun midis Prishtinës dhe Beogradit. Emocionet janë të forta dhe mendoj se është e kuptueshme, sepse dialogu është kërkues dhe i vështirë, i ngarkuar me histori - tha Borel.
Ai vlerësoi se rajoni i Ballkanit Perëndimor është shumë i ndarë dhe ka shumë kufij, dmth shumë vështirësi për lëvizjen e njerëzve dhe mallrave, prandaj ne duhet të punojmë për ndërtimin e Shengenit në Ballkan.
- Kur shikoni hartën e rajonit tuaj, nëse doni investime serioze dhe ju duhen, vështirë se do t'i merrni kaq të fragmentuara. Ne jemi një treg prej 40 milion njerëz. Dhe ju keni gjashtë vende me disa miliona njerëz secili. Dhe ju akoma vendosni kufij dhe jeni të ndarë. Kështu që do të jetë shumë e vështirë të tërheqësh dikë me kufij dhe sisteme të tilla - mendon Borel.
Sipas tij, e ardhmja e Ballkanit qëndron në BE, pavarësisht nga përpjekjet e Kinës dhe Rusisë, si dhe të Shteteve të Bashkuara, për të ushtruar ndikimin e tyre dhe për të qenë aktorë të rëndësishëm.
- Në thelb, asnjë prej tyre nuk mund të ofrojë asgjë aq të rëndësishme sa perspektiva evropiane dhe anëtarësimi në BE. Vetëm BE mund të bëjë një ofertë të tillë dhe një perspektivë të strukturuar për të ardhmen. I gjithë Ballkani ka një drejtim dhe udhëzues shumë të qartë për të ardhmen. Ne nuk mund ta lejojmë BiH të jetë një shtet i dështuar. Sepse nuk është në interesin tonë - tha Borel./Bota sot
