Sot Gjykata Kushtetuese e Kosovës do të marrë vendimin për ankesën e Lëvizjes Vetëvendosje, për votën e deputetit Etem Arifi, i cili kishte votuar Qeverinë Hoti.
Në lidhje me këtë, profesor doktor Binak Maxharraj, i ka drejtuar një kërkesë ushtrueses së detyrës së presidentes, Vjosa Osmanit.
Ai ka kërkuar nga Osmani që të shpallë zgjedhjet e parakohshme parlamentare, nëse Gjykata Kushtetuese konstaton që deputeti Arifi nuk kishte të drejtë vote, përcjell Bota sot.
Reagimi i tij i plotë në Facebook:
Vjosa Osmanit:
E nderuara u/d presidente, nëse Gjykata Kushtetuese e aprovon ankesën e LVV në rastin e deputetit Etem Arifi, i cili votoi qeverinë Hoti pa të drejtë vote, sepse ishte i dënuar nga gjykata që do të thotë se automatikisht qeveria Hoti bie:
Kërkoj nga ju në bazë të kompetencave që ua lejon Kushtetuta e Kosovës vendin menjëherë ta çoni në zgjedhjet e parakohshme.
Kjo është zgjidhja më e mirë për vendin, e njëkohësisht do të ndërpritet tollovia rreth zgjedhjes së Presidentit që e ka kapluar vendin qe sa kohë. Pas zgjedhjeve nacionale është më lehtë të zgjidhet edhe presidenti konsensual, apo më së miri do të ishte një njeri apolitik jashtë partive.